Rajnath-i Assam den Bangladesh arrtsü shibangtsü tuyu

New Delhi, June 3 (Agencies): Brihostibarnü review senden ka nung Union Home Minister, Rajnath Singh-i, Assam den Bangladesh arrtsü shibangtsü atema tuyuogo.

Assam Chief Minister tasenba, Sarbananda Sonowal-i, bendangertem ozüng alema state telungi aitba nokdangtsü atema küm ana tsüngda anüdoklen arrtsü shibangtsü ta metetdaktsüba sülen iba telemtetba ya agiogo.

Ministry of Home Affairs-i ashiba agi, tang Indo- Bangladesh arrtsü shibangtsü atema arrtsü kilometer 223.7 bo atsübangogo.

Ajisüaka kilometer 60.7 nung tesem 122 nung atsü atsüdanga mali. Anungji kilometer 1.9 nung tesem 100 nung atsü aser kilometer 48.8 nung ayong tesemtem 22 nung technological barriers yangluba ajanga arrtsü khenyongi shibangtsü lemtetogo. Iba maparen ya 2017 June ita tashi nungbo tembangtsü.

MHA-i ashiba agi, security atema International arrtsü nung kilometer 4,374 atsü, border roads kilometer 5,329.6, floodlights kilometer 3,974 aser Border Out Posts (BOPs) 2,420 yangluogo.

Home Minister-isa ketdangsertem dang arrtsülen security atema technology balala amshia inyaktsü tuyu. Iba nungji resolution cameras, radars, unattended ground sensors, optical fibres, infra red sensors, aerostats aser hand-held thermal imagers amshitsü.

You must be logged in to post a comment Login