Rajnath-i Bangladesh den arrtsüa aliba state tem den senden amentsü

New Delhi, December 4 (Agencies): Home Minister Rajnath Singh-i December 7, 2017 nü Kolkata nung north east nungi chief minister tem senden ka amentsü ayongogo aser iba nung Rohingya aser Bangladeshi nungertem India telungi aruba aser taila sen den mozütem shibelenba onüktem benoka olemteptsü.
West Bengal, Assam, Meghalaya, Tripura aser Mizoram nungi chief minister aser home minister temi iba senden nung Rohingya aser Bangladeshi nunger aruba nokdangtsü atema tebilembatem lemsateptsü, ta Home Ministry ketdangser kati ashi.
Item state temi Bangladesh den arrtsüa lir. Home minister-i international arrtsü aliba state tem nungi Chief minister tem den tang agi pezübenbuba senden amentsü. Taoba mapang pai Pakistan, China aser Myanmar den arrtsüa aliba state tem nungi chief minister tem den senden balala menogo.
December 7 nü Kolkata nung amentsü aliba senden nung India nunger taila sen aser ozüng alema mozü shibelenba, aser tim masüba maparen inyakba nokdangtsü atema onüktem lemsateptsü.
India-i Bangladesh den kilometer 4,096 shi arrtsüla lir aser iba nungi West Bengal den kilometer 2,217, Assam den kilometer 262, Meghalaya den kilometer 443, Tripura den kilometer 856 aser Mizoram den kilometer 180 agi arrtsüa lir.
Taküm küm tetenzüklen nungi October 31 tashi nung BSF-i Rohingya Muslim nunger 87 tashi arrtsü anasa apu aser parnok Bangladesh-i meyipa yok, ta BSF indang Director General, K K Sharma-i osang metetdaktsü.
Rohingya Muslim nunger lakh 9-10 shi ka Myanmar nungi Bangladesh nung oa jenoka lir aser parnoki India-i arutsübaji kecha meteta mali, ta Sharma-isa ashi.
Talisa Bangladesh nungeri ozüng alema India telungi aiter aser iba ya küm aika tejaklen nungi north east state tem aser West Bengal atema tebilemtsü süa arur, ta Home Ministry ketdangser kati ashi.