Rajnath-i Cabinet minister tem dang o kümdanga jembitsü tuyur

New Delhi, October 23 (Agencies) : Union minister tem – VK Singh aser Kiren Rijiju nati ashishitep aliba onük jembiba sülen Home minister Rajnath Singh-i Hokolbarnü par Cabinet züngsemtem dang o kümdanga jembitsü tetuyuba agütsü.
“VK Singh aser Rijiju napronglai tenati jembiba atema jangjashitsüogo saka asenok ya sorkar yimsü asüba telok ka nung züngsem ka ka ta asenoki meteta alitsü tim. Nübortem tenzüktsü asoshi asenok tebilemtsü khuret talila lemzüka lir aser iba jagi asenok jembishinü nung tebang azüoktsüla aser kanga kümdangtsüla” ta Rajnath-i ashi.
“Asenoki sorkar abener aser nübortemi asenok dak nungi tulu imlar. Anungji kanga junga bilemdanger ang jembishinütsüla” ta paisa ashi.
Haryana nung tila tanur ana tepsetba tatalokba atema union minister VK Singh-i den azü atishia jembiba ajanga nüburtem temulung yirutsüba sülen Rajnath-i kümdangtsü tetuyuba agütsüogo.
“Minister temi kanga bilemdanger ang jembitsüla. O jembiba sülen tangari mashileni meyipzük mesüra tamajungleni angateter ta mashitsüla” ta Home Minister-isa ashi.
Brihostibarnü Minister of State for External Affairs aser taoba Army tanishir, General VK Singh-i, “Nisung kari azü dak lung agi aon nung, ibaji sorkar indang tebilemtsü khuret masü” ta ashi.
Iba oren ajanga nisungtem temulung yirutsü kechiyong pai iba ya Faridabad nung arishi küm 2 tain tebur chanu ka den tenu ita 11 tain kinü tanur ka tepsetba tatalokba atema jembidang ashiba liasü.
Hombarnü jenjang temaba nung aliba kin ka nungi nisung telok kati Dalit nunger ki ka rongdoktsüdang tanur ana ya rongset.
“Ni iba oren ya atishia jembiba dang lir. Onoki linük atema kin aser tamangba yimsü mebendangi inyaker” ta tatsüka lir külen VK Singh-i Twitter nung metetdaktsü.
Iba onük asoshi National Commission for Scheduled Castes-i FIR ka benokba sülen police-i General Singh anema ken o benokogo. Ano Delhi nunga Aam Aadmi Party (AAP)-i police den VK Singh anema ken o ka benokogo.
Hokolbarnü Bihar chief minister, Nitish Kumar-ia General Singh-i tangar temulung yirutsüsa jembiogo ta aitsü.
“Central minister kati azü dak lung agi aonba den Dalit nunger kinü tanur tepsetba atishia jembiba ajanga parnok mulungsentsü sayur” ta Nitish Kumar-i ashi.
Ano külen, Minister of State for Home, Kiren Rijiju-i India anüdoklentip tsütsü alirtemi ozüng raksaba nung asüküma bilemer ta jembiba atema nisungtem temulung yirutsüogo.