Rajnath-i Haryana dena tanga state tem indang tensa reprangshi

New Delhi, August 26 (Agencies): Honibarnü Union Home Minister, Rajnath Singh-i north India nung state kar tensa reprangshi, talisa Dera Sacha Sauda tongtii tashiyim amshia tetsür raksatsüba ken o nung aitsüba sülen rara adoka nisung 31 asüba state, Haryana tensa reprangshiogo.
Iba mapang nung Union Home Secretary, Rajiv Mehrishi aser Intelligence Bureau chief, Rajiv Jain nati Union Minister dang Haryana, Punjab, Chandigarh, Delhi, Rajasthan aser Uttar Pradesh state tem indang tensa metetdaktsü.
National Security Adviser, Ajit Doval aser Paramilitary sepaitem nungia tongti ketdangsertema senden nungji dena liasü.
Iba tensa azüoktsü atema mera agiba indang osanga pa nem metetdaktsü, ta tongti ketdangser kati metetdaktsü.
Haryana nung Panchkula aser Sirsa na nung tensa mejungi lir, ajisüaka tanüngba tesemtem nungbo tensa azüoktetogo, ta Union Miister nem metetdaktsü.
Tetsür tashiyim amshia raksatsüba ken o nung court-i Dera Sacha Sauda tongti, Gurmeet Ram Rahim Singh aitsüba sülen pa sülen anidakertemi longkak aita raradang nisung 31 tashi süogo, ta Home Ministry-i metetdaktsü.
Ano Haryana aser Punjab tesem aika nung tenokdangba aika agütsüogo, iba den külemi Uttar Pradesh nung district 9, Delhi nung district ka aser Rajasthan nung district ana nung tenokdangba balala agüja lir, ta ketdangseri ashi.
Police den yaritepa inyaktsü atema Haryana, Punjab aser Chandigarh nung paramilitary sepai 20,000 shi yokogo.
Army tem Dera headquarters tonga aruogo
Dera Sacha Sauda tongti, Gurmeet Ram Rahim Singh-i pa sülen anidaker tetsür ana tashiyim amshia raksatsüba ken o nung aitsüba sülen Honibarnü Army tem Haryana, Sirsa nung aliba Dera Sacha Sauda headquarters tonga aru.
Iba sülen army temi tamangertem dang headquarters nungi aienshitsü tetuyuba agütsü. Headquarter nung aliba tamanger meyirjang aikaji iba tesem nungi belentsü asoshi bus aika yok, ajisüaka aikati iba tesem toktsür aotsü memelunger, ta osang angazüker.
Item osang angashiba sülen yashi Ato kilonser, Narendra Modi-i, “Tanü rara adokba ya tejashitsüka lir. Ni item rara aitsür aser ajak dang yimjung nung alitsü ajungshir,” ta twitter ajanga metetdakja liasü.