Rajnath-i J&K aser Assam security tensa asadangogo

New Delhi, August 16 (Agencies): Tanü temaba jenjang senden ka nung National Security Adviser, Ajit Doval, Intelligence Bureau Director aser Intelligence agency balala nung tongti ketdangsertemi Union Home minister, Rajnath Singh  nem Jammu & Kashmir aser Assam na nung security tensa osang metetdakja liasü.
Home Minister Singh-i tang rara adoka mesüngjemteti aliba Jammu & Kashmir tensa asadangba sülen pai nüburtem aser sepaitem taküm mesamatsü atema tetuyuba agütsüogo, ta osang angazüker.
Hombarnüa telungpurtemi amakdang Srinagar, Nowhatta nung CRPF commanding officer ka tepset aser paramilitary sepai teku yirua liasü.
Tanüa Kashmir kübok Budgam aser Anantnag district na nung longkak aitertem aser sepaitem tsüngda raradang nisung pongu tashi süogo aser aika yiruogo.
Senden nung Singh-i ketdangsertem dang, arrtsülen aliba state nung tensa süngjemtsü atema tajungtiba agi inyakang aser akokba tashi nübur aser sepaitem taküm mesamadaktsütsü merangang ta tuyuogo, ta ketdangsertem osang ka ajanga ashi.
Senden nungsa Kashmir, Uri Sector nung telungpurtemi Line of Control (LoC) adena aittsü merangba indang osang Home Minister nem metetdakja liasü.
Singh-isa Assam nung telungpurtemi amakba tensa asadangogo.
Yashi Assam nung 70buba Independence Day anogomung nung ULFA telungpurtemi Charaido aser Tinsukia na nung bomb pongu pokdaktsüba sülen Singh-i state tensa asadang.
August 5, 14 nü Assam, Kokrajhar district kübok Balajan nung NDFB (Songbijit) telungpurtemi amakba lendong nung nisung 14 asü aser nisung 20 dak tema yirua liasü.