Rajnath-i Nagaland nung Emergency Response Support System tenzüktsü

Kohima, Luchii (December) 1 (TYO): Nagaland nung tanü Emergency Response Support System (ERSS) – 112 tenzükogo aser iba ya North East nung state mezüngbuba aser linük nung Himachal Pradesh sülen state tanabuba lir.
Police Headquarters nung Honibarnü Union Home Minister, Rajnath Singh-i system tenzüktsü. Iba mapang Chief Minister Neiphiu Rio, Deputy CM Y Patton, Minister tem, Advisor tem aser DGP T John Longkumer-i anir tongti ketdangsertem liasü.
ERSS project kübok nübortemi pan-India single emergency number 112 amshia Police, Health aser Fire Departments den ano tanga agency tem nungi tangsa tang teyari angutsü, ta Rajnath-i ashi.
“Linük nütsüng yongsük tesadang ka tetsürtem lir aser tetsürtem kümzüka ayuba linük ka nung renlokbaji shingaia menoktangtettsü. Anungji linük tejakleni odaktsütsü atema tetsürtem kümzüka ayutsüla aser parnoki kechisarena ajak nung shilem agidaktsütsüla” ta paisa ashi.
“Asenoki asen yimtitem aser talidak ajak lendong nungi kümzüka yura, tetsürtemi linük renlokba mapa nung shilem agitsü aser asenok tejakleni aotsü. Iba asoshi sorkari mapa aika inyakogo aser iba nung Ministry nung Women Safety Division tentetba den Indian Penal Code aser Code of Criminal Procedure nung ozüngtem tesashiba yangluba lir” ta Rajnath-isa metetdaktsü.
Tetsürtem dak tashiyim mapa inyakba ken o tem angadangtsü asoshi Fast Track Courts lapokogo aser National Data base ka lapokogo. Iba dak sendakba nung tanü PAN India 24X7 helpline number 112 lapoker aser tetsürtem kümzüka ayutsü atema ‘112 India’ mobile app nung tetsürtem atema SHOUT feature balaka yanglua lir, ta Home Minister-isa shisem.
Iba asoshi Kohima nung Emergency Response Centre (ERC) ka lapokogo aser District Command Center asem tashi emergency service agütsütsüba den Response Vehicles nung Mobile Data terminals (MDTs) enoksemogo.
Sentong nung Nagaland Chief Minister Neiphiu Rio-ia o tatsüka jembidang ERSS ya inyakyim tajung ka lir aser iba ajanga sensotem lendong nungi kümzüka ayur, ta ashi.
Tanü nungi 19 buba Hornbill Festival tenzükba anogo nung ERSS lapokba ya mapang shitak lir. Taruba anogo 10 tashi tourist lakh aika Kohima-i arutsü aser iba mapang asenoki tourist ajak lendong nungi kümzük ayutsüla, ta Rio-isa shisem.
Union Home Minister aser India sorkari iba mapatong atema sen crore 4.84 agütsüba atema kanga pelar aser Centre for Development of Advanced Computing (CDAC)-i ERSS asoshi technological support agütsüba atema pelaba shisemer, ta Nagaland chief minister-isa metetdaktsü.
Tang atema iba mapatong ya Kohima, Dimapur aser Mokokchung district tem nung inyaktsü aser kobi melii tanüngba district tem nunga tenzüktsü, ta paisa shisem.