Rajnath-i NE CM-tem ajurua ken o lemteptsü

Agartala, July 09 : Union Home Minister Rajnath Singh-i tan July 11, 2015 nü Guwahati nung North East state ti prongla nungi Chief minister-tem ajurua nüngdak rongdak ken o lemteptsü sentong renema lir. Iba senden nung Northeast nung kiralongraba mapa inyakba aser arrtsülen nungi timtem marutsüsa inyaktsü atema ken o tongtibang kar süoka jembitsü.
“Rajnath Singh aser pa yariba Kiren Rijiju nati tan Honibar nü Guwahati nung Northeast state ti prongla nungi Chief Minister-tem ajurua jembitsü,” ta Tripura Home Department nung ketdangser kati metetdaktsü. Iba senden nung kiralongraba mapatem, arrtsülen teinyaktsütem aser alima lendong tsüdong dak aketba tebilemtsütem nung onük benoa ken o lemteper külen teinyaktsü sentongtema kar latettsü, ta paisa ashi.
Iba senden nung chief minister-tem den home ministry, border management department, intelligence, Border Security Force (BSF), Assam Rifles aser State government shia nungi tongtibang ketdangsertem arua adentsü.
Tawa Northeast tesem kar nung kiralongraba mapatem inyakba ajanga Union Home Ministry aser army-temi ozüng anema inyaker teloktem anema kanga sashia nokdaktsüsa akümer.
Naga nunger telong nung alir telok National Socialist Council of Nagaland (Khaplang) (NSCN-K) teloki India sorkar den yimjung nung malitsü asoshi sangdongba sülen Northeast nungi tanga state nung aliba telongpurtem den külemi tashiyim mapa ya inyaker ta army-temi puteta lir.
Tang tashi nung item telongpurtem jagi India nunger sepai amakba tesashitibaji June, 2015 anogo nung Manipur kübok Chandel district nung sepai 18 kahsetba aser 15 yirutsüba mapatemji asütsü.
Iba lendong atalokba mapatem ya National Investigation Agency ajanga bushisüngdagi.
June 4 lendong jakdang, Meghalaya, Nagaland, Arunachal Pradesh, Assam aser Mizoram state-tem nung telongpur teloktemi sepai nisung 20 shi kahseter liasü.
Manipur o Myanmar na tsüngda arrtsü kilometer 398 lir aser Manipur nung telongpur telok 40 shi lir.
Ajisüaka, Tripura nungbo telongpurtemi timtem agütsüba ajema akümba agi taküm May ita nung state sorkari Armed Forces Special Powers Act (AFSPA) ozüng agüja aliba agienogo. Iba ozüng ya Tripura nung telongpurtem ajemreptsü asoshi küm 18 jakdang agüja liasü.
Myanmar aser India arrtsülen India sorkari June 4 nü amakertemji mita odagi aser June 4 nü sepaitem gari nung ooya lia amakertem rongnung nisung karbo khasetogo ta angazüker.