Rajnath-i Pragya Thakur majuru: BJP

New Delhi, July 09 (Agencies): Congress lenir, Digvijay Singh-i, Rajnath Singh-i 2008 küm Melegaon bomb lendong  ken o nung tai tonglokja alila, Pragya Thakur ajuruogo ta jembiba dak sentakba nung BJP-i,  Union Home Minister, Rajnath-i Pragya Thakur kodanga majuru aser iba oji tamendakdak maka, ta ashi.
BJP National Secretary, Shrikant Sharma-i, “Rajnath Singh-i Pragya Thakur kodanga majuru. Iba oji tiazü. Digvijay Singh-i jembiba o atema BJP-i pa aitsür,” ta ashi.
Digvijay Singh-i Islamic sayutsüngir, Zakir Naik den külemi sabang ka nungi shilem agiba aser pa tenüng asangba atema pa aitsüdar, aser yashi pai, Rajnath-i Thakur ajuruogo, ta jembia liasü.
Tamalena Congress General Secretary Singh-i iba oji jembia lir, ajisüaka Rajnath Singh-ibo iba oji tiazü ta shiogo.
Iba ya linük security onük ka lir anungji Congress lenirtem- Sonia Gandhi aser Rahul Gandhi nati iba dak sentakba jembitsüla, ta Sharma-isa ashi.
“Himachal Pradesh aser Uttarakhand na nung ochimashi nung densema aliba par chief minister tem den Aircel Maxis aser chopper ochimashi ken o atema parnoki ola madokbaji ajaki angateter, kechiyong parnoka National Herald ken o nung tai tonglokja lir. Ajisüaka linük security onük nungbo parnoki ola madoki malitsüla,” ta Sharma-isa ashi.
Tawa Dhaka amaker kiralongrartem rongnung kiralongrar kabo Islam sayutsüngir, Naik-i jembiba onüktem ajanga ajungmeso ta BJP-i Naik nem tai tonglokja lir.
Congress aitsüba olen ka nung BJP lenirisa, “Asen linük nung nisung kari ISIS pusemra, ibaji linük ashioktsüba lir. Bushisüngdangba agency temi temerneshi tulu agütsütsüla,” ta ashi.
Digvijay Singh-i pa o nungi masetshii tanü twitter ajanga Madhya Pradesh chief minister, Shivraj Singh Chouhan Singh, Rajnath Singh aser Pragya Thakur nunger külemi tangokba noksa ka sayaogo.