Rajnath-i security agency 13 den senden kaogo

New Delhi, January 16 (Agencies): Honibarnü New Delhi nung Union Home Minister Rajnath Singh-i state balala nungi security agency 13 den ajurutepa social media ajanga Islamic State (IS)-i lanurtem mesüzükba tebilemtsü onük benoka lemsatepogo.
Paisa Delhi, Uttar Pradesh, Kerala, Jammu & Kashmir, Andhra Pradesh, Telangana, Bihar, Tamil Nadu, West Bengal, Assam, Karnataka, Madhya Pradesh aser Maharashtra state tem nungi ketdangsertem den security tensa asadanga liasü.
Intelligence department aser ozüng benokba agency tem nungi ketdangsertem den Singh-i ‘Daesh’ dak sentakba- ISIL, ISIS mesüra IS onüktem nung o lemtep, ta home ministry sangdong ka ajanga ashi.
Tanü o lemtepba onüktem rongnung social media tim mesüi amshiba aser lanurtem IS dangi atsür arutettsüsa inyakba kulitem densema liasü, ta kasa sangdong nung ashi.
Iba senden nungsa India temekettem nung IS maparen, ozüng benokertemi inyaktettsü mapatong, minority tem atema tapet welfare schemes, social media asalendong aser state police organization nung information technology amshitsü atema süoka jembiogo.
Senden nung Rajnath-i, “India indang sobaliba aser tangatetba tajungtem ajanga iba temenen madak takok angutsü,” ta ashi.
Paisa, lenla ajungalen kanga kümküma alitsü nüngdak ta ashiba den külemi India nung Muslim tentet aikati Daesh densema kiralongraba mapa ajak anema ola adoker, ta shisem.