New Delhi, August 01 (Agencies): Tan hopta SAARC senden nung adentsü atema India Home Minister, Rajnath Singh-i Islamabad semdangba mapang Pakistan nung amenoka aliba kiralongrar, Hafiz Saeed-i Pakistan linük ajaklen longkak aittsü ayongzüktsü, ta amokmerenogo.
Iba dak sentakba nung Hombar anepdang Minister of State for Home, Kiren Rijiju-i osangbenertm dang, “Security tensa kar adokra ibaji Pakistan khuret asütsü,” ta ashi.
“Home minister SAARC (South Asian Association of Regional Cooperation) Home Ministers’ conference nung adentsü atema Pakistan-i aotsü, iba ya linük ana tsüngda senden ka masü saka linük aika tsüngda senden ka lir, ken o jembidang kiralongraba indanga jembitsü,” ta Rijiju-i metetdaktsüogo.
Saeed-i amokmerenba dak sentakba nung India sorkari, sentong yanglua aliba ama tan hopta Rajnath Pakistan-i aotsü, ta shiogo.
Hombar anepdang kiralongrar telok, Jamaat-ud-Dawah (JuD) tentetsang aser 2008 küm Mumbai amakba nung tongti asameyangsang Saeed-i, “Tai maket Kashmiri nunger tepsetbaji Home minister Rajnath Singh ajanga lir,” ta ashi.
Paisa, SAARC senden nung adentsü atema India Home minister Islamabad-i arura par telok züngsemtemi Pakistan tesem ajaklen longkak aittsü, ta amokmeren.
Ano külen kiralongrar telok, Hizbul Mujahideen züngsem, Syed Salahuddin-ia Pakistan Ato kilonser, Nawaz Sharif dang, tangsa linük ambassador New Delhi nungi anir arutsüla aser India den shishilembaba shibangba den külemi linük tesendaktep raksatsüla, ta khangogo.
Sepaitemi Hizbul Mujahideen commander, Burhan Wani tepsetba sülen Kashmir nung longkak aita sepaitem den raradang tajemba agi nisung 50 tashi süogo.
Rajnath-i SAARC senden nung Pakistan linüki kiralongra pusemba indang benoka jembitsü. Pai Pakistan dang odiodia, India nung kiralongraba pusemba anenang ta ashitsü, ta ketdangsertem osang ka ajanga metetdaktsüogo.
Taküm January 2 nü nung kiralongrartemi Pathankot airbase amakba ajanga India aser Pakistan tesentaktep mekonga akumba sülen tang mezüng India tongti ketdangser kati Pakistan semdanger asütsü.
Taoba SAARC Home Ministers senden 2014 küm Kathmandu nung liasü, aser iba mapang nung home minister-i, iba telok nung züngsem linüktemi kasa tayongzükbatem ajurur, anungji SAARC züngsem linük ajaki amalitepa inyaktsüla, ta ayongzüka liasü.
You must be logged in to post a comment Login