Rajnath Singh aser J&K DGP Dilgabh Singh nati mang süngden apu; Alima lennirtemi khukhua aitsür; Kiralongraba anema inyaktsü ayongzüker

New Delhi, February 15 (Agencies): Hokolbarnü Union Home Minister Rajnath Singh den J&K DGP Dilbagh Singh nati CRPF jawan ka indang tasümang süngden apu.
Jammu & Kashmir kübok Pulwama nung kiralongrartemi amakdang asüba sepaitem mang nung naro yuja tetushi agütsüba sülen Rajnath aser Dilbagh nati süngdenji apur mein.
Bomb agi CRPF bus ka amakba mapa atema Jaish-e-Mohammad-i tenüng agiogo.
Tanü Rajnath-i Delhi nungi J&K atongba sülen CRPF sepai 40 indang mang ayudak sentong ka nung aden.
Idangji pai CRPF jawan ka indang süngden apur special aircraft kati bener ao, ta ketdangser kati ashi.
Tasür nem akhüm tetushi agüja naro yutsüba sentong nung Rajnath den J&K Governor Satya Pal Malik, Home Secretary Rajiv Gauba, CRPF Director General R R Bhatnagar, Jammu & Kashmir DGP Dilbagh Singh nungertem liasü.
“Asen tasü tait CRPF jawan temi taküm bendanga agütsüba ya linüki kodanga mamatsü. Pulwama nung linük asoshi taküm bendanga agütsür nem ni tetushi agütsüogo. Parnoki bendanga agütsüba ya amajok masütsü” ta Rajnath-i ashi.
Hokolbarnü Prime Minister Narendra Modi-ia “iba mapa inyakertemi takok tulu ajurutsü aser kiralongrartem anema inyaktsü atema security forces nem tashi agütsütsü” ta ashi.
“Nisungtem azü jaa atur aser kiralongraba mapa inyaker merenshitsüsa” ta Modi-i metetdaktsü.
Brihostibarnü Kashmir nung sepaitem amenba bus gari amakdang sepai 40 poksetba mapa ya alimai aitsür.
US, France, Russia, Sri Lanka, Nepal, Bhutan aser Maldives linüktemi mezüng iba tatalokba aitsüba osang metetdaktsü.
“U.S. Mission in India-i tanü Jammu & Kashmir nung kiralongrartemi amakba mapa khukhua aitsür. Onoki tasür kibongtem den mangyim lemateper. Kiralongraba anema inyakba aser raraba nung United States-i India den külemi noktaka lir” ta US ambassador to India Kenneth Juster-i ashi.
Sri Lanka Prime Minister Ranil Wikremesinghe-ia kasa olenji ashiba den Pulwama amakba ya 1989 küm sülen kiralongraba mapa tamajungtiba lir ta shisem.
Nepal Prime Minister K.P. Sharma Oli-ia Prime minister Narendra Modi den phone ajanga sepaitem asüba atema mangyimba osang lemsatep.
Bhutan nung foreign ministry-ia ashiba agi, “Kashmir nung kiralongrartemi tesempatsü mapa inyakba osang angashia kanga aokar. Onoki iba mapa khukhua aitsür aser tasür kibongtem, nübortem aser India sorkar den asükhu lemsateper.”
Maldives foreign minister Abdulla Shahid-ia foreign minister Sushma Swaraj dangi shidi ka nung kanga aoksaba metetdaktsü.
“Pulwama, Kashmir nung bomb apokba aser CRPF sepai aika asüba osang angashidang kanga aoksa. Maldives sorkar aser nübortemi iba kiralongraba mapa aitsür” ta Shahid-i ashi.
France nung foreign minister Yves Le Drian-ia India nung kiralongrartemi amakba mapa aitsüba metetdaktsü.
“Tasür kibongtem den ni asükhu lemsateper aser India sorkar aser nübortem den külemi noktaker. Kiralongraba mapa inyakba anema France-i teti India den külemi yaritepa arur. Linük ajaki kiralongraba aser parnok nem senotsü agütsüba maparen anema mapa inyaktsüla aser arrtsü adena kiralongra mapa inyaker Jaish-e-Mohammed ama teloktem noktangtsüla” ta Drian-i metetdaktsü.
Russian embassy-isa sangdong ka nung Kashmir kübok Pulwama district nung kiralongrartemi amakba mapa khukhua aitsür ta metetdaktsü.
Maneni, Israeli ambassador to India Ron Malka-ia ashiba agi “Pulwama nung kiralongrartemi amakba mapa Israel-i khukhua aitsür. Iba ama mapang tamajung nung onoki India den külemi noktaker. CPRF aser parnok kibongtem, India nunger aser India sorkar den onoki asükhu lemsateper” ta Malka-i metetdaktsü.