Rajnath Singh-i Congress sorkar aitsür; BJP ‘vision document’ nung Highway Protection Force tentettsü nangzüker

Imphal, February 19 (Agencies) : Manipur nung ita asem tema rongsenren mokdangba ya state nung Congress sorkari tasa atonga inyakba mapa ka lir, ta Union Home Minister Rajnath Singh-i tanü ashi.
“Manipur nung Congress sorkar tamakoktem nembangtsü atema sorkari tasa atonga inyakba ama ni bilemer. Centre-i teyari agüjaka, kechiba tang tashi rongsenren mokdangba magiener’ar ni metetnür” ta BJP lenniri ashi.
“Ni state sorkar dang iba khuret angatetteptsü atema UNC aser Centre den olemtep alitsü shiogo. Onoki central forces peria agütsüogo, saka state sorkari sepaitem mamshir” ta Rajnath-i Manipur Assembly elections atema BJP Vision Document sayadang ashi.
State sorkari district tasen tenet tentettsü telemtetba agiba ajanga Manipur nung aliba Naga nunger litsü lemdangtsü ta lungkak aita, yaküm November 1 nungi United Naga Council (UNC)-i National Highway anaprong mokdanger.
Ajisüaka, state sorkari ashiba agi parnoki district tasen tentetbaji tiptema ketdangsübaren inyaktsü atema liasü.
UNC-i NH2 (Dimapur adena) aser NH 37 (Jiribam adena) mokdangba ajanga Manipur-i jangotsü aser tang nüngdakba osettem peria bener maruteti kangshir.
“Law & order ji state indang khuret ka lir. Kodang mokdangba tenzük, ni aiben CM Okram Ibobi Singh den phone ajanga jembi aser mokdang agientsü atema onoki akokba tashi yariteptsü ta nangzük” ta Union Home Minister-i ashi.
August 2015 nung Centre aser NSCN(IM) tsüngda ‘framework agreement’ sign sütepba nung Manipur litsü atema lendong keta lir ta Congress-i aitsür, saka Rajnath-i ashiba agi, state sorkari olulu prokshia nübortemi mashileni anitsü meranger.
“Centre sorkari aser BJP nati Manipur nunger litsü nung mekongshitsü atema mapa inyaktsü ta ni nangzüker. Famework agreement nung Manipur tenüng khen danga tetshia mali. Anungji kechiba parnoki tiyazü osang prokshir? Parnoki timi dang yimtenren mapa inyaktsüla” ta paisa shisem.
Rajnath-isa Ibobi Singh’er sorkari küm 15 tashi sorkar tashi bena aruaka, parnoki mapa magütsüteter, infrastructure meyanglur aser tzü tajemtsü magütsüteter, ta aitsü.
“Onoki sorkar akümtsü tashi ngura, mapa agütsütsü. BJP aser sorkar junga ketdangsüba naji külemi lir” ta paisa ashi.
Deobarnü BJP lennir Rajnath aser BJP General Secretary Ram Madhav nati Manipur BJP indang ‘vision document 2017’ sayaba nung Highway Protection Force tentettsü densema lir. Iba Force ajanga Manipur nung mokdangba malitsü, ta document nung shia lir.
Tapak 24 aliba vision document nung Manipur litsü, sobaliba aser nübortem kümzüka ayutsü nangzüka lir.
UNC-i Manipur nung highway ana mokdanga aliba mapang ka nung BJP-i Highway Protection Force tentettsü indang tenangzükba agir asütsü.
BJP-isa taila kahtepdang kahsetba indang aser ochimashi ken o tem bushisüngdangtsü aser aibelenertem ozüng tapet agi merenshitsü nangzükogo.
“Onoki state nung kilen shia nem mapa ka atema maongka agütsütsü. Onoki tetsürtem graduate masü tashi angati education agütsütsü. Onoki talidak malir senso nem ki agütsütsü. Onoki district ajak nung ‘four lane’ gari lenmangtem yanglutsütsü. Onoki BPL sensotem nem health insurance agütsütsü” ta tanü BJP lenir kati ‘vision document 2017’ zünga metetdaktsü.