Rajnath Singh-i Kashmir tensa asadang; CM Mehbooba den jembi

New Delhi, July 10 (Agencies): Kashmir nung security sepaitemi Hizbul Mujahideen telungpur commander, Burhan Wani tepsetba ajanga Kashmir nung tensa mejungi akumba sülen tanü Union Home Minister, Rajnath Singh-i Jammu & Kashmir tensa reprangshiba den külemi Chief Minister Mehbooba Mufti den jembidang, Centre-i akokba tashi teyari agütsütsü ta la dang ashi.
Minute 30 senden amendang Home Minister, Rajnath nem Kashmir Valley tensa osang ajak metetdakja liasü.
Yashi pai telephone ajanga Mehbooba den jembidang Centre-i la nem teyari ajak agütsütsü ta shiogo, ta Home Ministry ketdangser kati ashi.
Iba senden nung Home Minister-i ketdangsertem dang Kashmir nung paramilitary sepiatem peria agüjang aser Kashmir Valley nung tensa tekaraba nung süngjemtsü atema akok tashi agi state sorkar den yaritepdang, ta tuyu.
Ministry ketdangserisa, Srinagar nung anenzüka aliba Amarnath temeshi aieni aortem sepaitemi meina ogo, ta ashi.
Kashmir Valley nung tensa raksaba ajanga tanü agi anogo ananübuba temeshi aieni aortem thinena liasü.
Olulu meproktsü aser tensa tamajungba makümtsü atema Mobile aser  Internet services shibangja lir.
Home Minister-isa, tensa raksatsüsa aliba tesemtem nung security sepaitem toktsütsüla aser state-i nüngdakra paramilitary sepaitem tali yoksemang ta tuyu.
Iba senden nung Home Ministry ketdangsertem, paramilitary sepai ketdangsertem aser Intelligence agency tem dena liasü.