Rajnath Singh-i Manipur sorkar aartsü

New Delhi, December 22 (Agencies): Manipur den sendaktepba National Highway mapang talangka nokdangba atema tebilemtsü kaa Brihostibarnü Union Home Ministry-i state sorkari pei teinyaktsü mapa meinyaktetba atema aartsüogo.
Union Home Minister, Rajnath Singh-i Nagaland Chief Minister, T R Zeliang danga, par state adena aoba lenmang nung gari senzüba nung timtem malitsü atema inyakang, kechiyong Naga Students Federation-i Nagaland nung garitem nokdanger ta osang angazüker, ta ashi.
Manipur Chief Minister, O Ibobi Singh dang Rajnath Singh-i, National Highway-2 tanen makai nokdangba ajanga tensa mejungi kümogo, koba ajanga Manipur nung nüngdakba osettsüset/chiyungtsü agi kanga anünger aser tzüzüng-ozüng raksar, ta ashi.
Home Minister-i Manipur Chief Minister dang, “India sorkari aiben mepishiaka aser local sepaitem den yariteptsü atema Central sepaitem yokaka state sorkari National Highway-2 melapokteter,” ta ashi.
Home Minister-isa CM dang, “Tzüzüng-ozüng benoktsü aser nüngdakba osettsüset supply asütsüji temzüng nung state sorkar teinyaktsü mapa lir,” ta ashi.
“Manipur nüburtem atema ni nü dang item temzüng teinyaktsü kanga nendaka tekaraba nung inyaktsü ni nü nem metetdaktsür, iba den külemi NH-2 lapoktsü atema India sorkari ner sepaitem yaritsü ta lepshia ashir,” ta Rajnath-i ashi.
Tanü Manipur nung tatalokba kecha makai tensa tajungba kümogo, aser Imphal district ana nung curfew ozüng agienogo.
Ajisüaka aonung 9:00 ako nungi anepdang 4:00 ako tashi ghonda tenet curfew ozüng maneni alitsü, ta Imphal East aser Imphal West District Magistrate-i metetdaktsü.
Ano Mobile internet services December 18 nü anenja alibaji Khristmas tashi maneni alitsü.
Manipur nung aliba lokti balala tesentaktep junga alitsü nükjidong nung tanü Manipur nung amenoka aliba telok balalai lokti senden ka ayonga agiogo.
Parnokisa United Naga Council (UNC) anogo 52 tashi rongsenkettsüng lenmang mokdanga aliba ya Khristmas matongdang agiendaktsüner, ta mepishiogo.