Rajnath Singh-i NE nung Chief Minister pezü ajurutsü

Aizawl, June 08 (Agencies): June 12, 2017 nü (Hombar) Aizawl nung Union Home Minister, Rajnath Singh-i Northeast nung Myanmar den arrtsüa aliba state pezü nungi Chief Minister tem ajurua security tensa reprangshitsü, iba sülen pai helicopter nung mener arrtsülen aliba tesemtem repranga senzütsü, ta ketdangser kati metetdaktsü.
Tanü Aizawl nung Mizoram home department ketdangser kati, “Hombarnü yangi (Aizawl) Union Home Minister Rajnath Singh-i Manipur, Arunachal Pradesh, Nagaland aser Mizoram state tem nungi Chief Minister tem den senden mena India-Myanmar arrtsülen security tensa reprangshitsü,” ta metetdaktsü.
Kasa senden nung Union Minister of State for Home, Kiren Rijiju den Home Ministry nungi tongti ketdangsertema adentsü.
“Mongolbarnü Union Home Minister-i helicopter nung mener Myanmar arrtsülen repranga senzütsü. Minister-isa Assam Rifles tongti ketdangsertem den senden mena India-Myanmar arrtsü tensa indang jembitsü,” ta ketdangserisa shisem.
“India-Myanmar arrtsülen atsü matsüi aliba Mizoram tsütsü Myanmar nungi ozüng alema inyakertemi temesepba mozü aser prangpong shibelener,” ta ketdangserisa ashi.
Mizoram aser Myanmar arrtsü nung kilometer 510 atsü matsüi lir aser Bangladesh den kilometer 318 atsü matsüi lir, aser ibaji ajanga ozüng alema inyakertem, kiralongrartem aser ozüng alema shibelenertem sademsadema senzüteter.