Rajnish Kumar SBI Chairman shim

New Delhi, October 04 (Agencies): Sorkari public sector nung bank tulutiba, State bank of India (SBI) Chairman atema Rajnish Kumar shimogo.
October 7, 2017 nungi tenzüka Kumar küm asem SBI Chairman inyaktsü atema shimbaji Appointments Committee of the Cabinet-i agizükogo, ta tanü Department of Personnel and Training (DoPT)-i metetdaktsü.
SBI Chairman atema pa shimba ya kecha tesüngmangtsü mali, kechiyong iba menden atema shimtsü aliba tongtipur rongnung pa densema liasü.
Kumar ya SBI managing director pezü rongnung ka liasü, aser pa ya 1980 küm SBI nung probationary officer ama mapai ia liasü, iba sülen pa department balala aika nung inyakogo.
2015 küm pa national banking group MD meinyakdang pa SBI Capital Markets nung managing director aser CEO inyaka liasü. Kumar ya tang SBI retail business nung tongti lir.
Tang SBI Chairman teinyakdak, Arundhati Bhattacharya ya October 6, 2017 nü mapa nungi anisüngzüktsü. 2013 küm October ita nung la SBI tongti shima liasü.
Iba menden atema kümsükji küm 3 dang lir, ajisüaka yaküm sorkari la ano küm ka atema shimshia liasü. Tetsürtem rongnungbo SBI tongti mezüng inyaklaji la lir. October 7 nü Kumar-i la melenzüktsü.
Sorkari teti agia SBI tongtiji telung nung candidates den angatettepa shimmer, aser aji oda iba inyakyim nung Kumar-a shimogo.