Rajya Sabha election: BJP-i Uttar Pradesh nung mang yangtetogo

New Delhi, Metsüremi 24 (Agencies): Bahujan Samaj Party (BSP) lenir, Mayawati asoshi taoksatsü osang ka nung, Bharatiya Janata Party (BJP)-i Uttar Pradesh nungi Rajya Sabha election nung menden ter nungi toku nguteta state nung tawa by-poll agiba mangyangteta tang tesüsa dentetba SP-BSP alliance madak takok angu. Rajya Sabha nung menden 25 atema election ya state trok – Uttar Pradesh, West Bengal, Karnataka, Jharkhand, Chhattisgarh and Telangana – nung Rogonü agi. Item state nung kanga junga takok ngutetba ajanga Rajya Sabha nung BJP ya party tulutiba kümdakja Congress den tetsüngta tulu kümadoker.
Linük Ato Kilonser Narendra Modi-i Twitter ajanga takok angur ajunga den tepela lemsatepogo.
“State balala nungi Rajya Sabha atema shimteter ajak den takokba tepela salem lemsateper. Pei state tenüng nung inyakdang nüburtemi aginüba ama ola adoktsü teimla nung atar,” ta pai zülutsü.
Rajya Sabha nung menden 58 tazüng aliba atema election ya agia liasü saka state 10 nungi candidate 33 den tokteper amliba ajanga Metsüremi (March) 15 nung parnoki takok anguba sangdonga liasü. Item rongnung Ravi Shankar Prasad aser Prakash Javadekar na densema union minister tenet liasü.
Uttar Pradesh nungi Rajya Sabha nung menden 10 liasü saka BJP-i menden ti tashi election magie nguadok, anungji BSP-SP alliance temi menden ka atema toktepa liasü, saka iba menden ya BJP nungi Anil Agrawal-i BSP candidate, Bhim Rao Ambedkar madak takok angu.
BJP candidate Arun Jaitley, Anil Jain, GVL Narasimha Rao, Vijay Pal Tomar, Kanta Kardam, Ashok Bajpai, Harnath Yadav, Sakaldeep Rajbhar nungertem aser Samajwadi Party nungi Jaya Bachchan-i menden toku ya angu. Uttar Pradesh nung MLA kari party tanga nungi süaka BJP nem vote agütsü ta BSP-SP alliance-i Election Commission nem ashishitep ken o benokba ajanga vote azüngba ya ghonda ana dak tali anena ata. BSP nungi Anil Singh aser independent MLA Aman Mani Tripathi nati BJP nem vote agütsü ta yimjak nung sangdong.
West Bengal nungi Rogonü Rajya Sabha menden atema election agiba nung Trinamool Congress-i menden pezü aser Congress-i menden ka ngutet. Vote azüngba nung Trinamool Congress nungi Rajya Sabha nung tang teinyakdak, Nadimul Haque aser mezüng nominate asür, Subhasish Chakraborty, Abir Biswas aser Santanu Sen nungertemi takok angu. Abhishek Manu Singhvi-i vote 47, Nadimul Haque-i vote 52, Subhasish Chakraborty-i vote 54, Abir Biswas-i vote 52 aser Santunu Sen-i vote 51 ngutet. Left Front-i yariba CPI(M) candidate, Rabin Deb tamakok angu. Pai menden pongububa atema toktep aser vote 30 dang ngutet.
Karnataka state sorkar denteta aliba Congress nungi Rajya Sabha menden asem angu aser BJP-i ka angu. Congress nungi Dr L Hanumanthaiah, Dr Syed Naseer Hussain aser GC Chandrasekhar, aser BJP nungi Rajeev Chandrashekar nungertemi Rajya Sabha menden nguogo ta returning officer temi sangdong. Tim masüba maparen kar inyak, ta Janata Dal-i Election Commission nem ashishitep ken o ka agütsüba ajanga vote azüngba mapang tatsüka anena liasü saka EC-i iba ken o magizük.
Jharkhand nung Congress aser BJP telok nungi menden kaka ngutet. BJP candidate Sameer Oraon-i takok angu aser kasa mapang Congress nungi Dheeraj Sahu-i BJP candidate, Pradeep Santhalia tsükdaktsü. Jharkhand Vikas Morcha (JVM) MLA kati pa indang ballot ya par party pur bolling agent nem mesayu, ta JVM aser Congress-i ashishitepba ajanga Jharkhand nung vote azüngba khen anena liasü. Saka video reprangba sülen Jharkhand Vikas Morcha MLA Prakash Ram indang ken o benokba ya Election Commission-i magizük. Vote agütsüba sülen pa indang ballot paper ya party representative nem mesayu, ta aitsü. Temzüng nung aliba ama MLA Prakash Ram-i vote magütsü tsüngta par party indang polling agent dang ballot paper mesayuba ajanga MLA Prakash Ram ya JVM party nungi khen asoshi anentsü. MLA 80 pronglai vote shidak agütsü, ta assembly osang ajanga ashi.
Chhattisgarh nungi Rajya Sabha menden ka asoshi election agiba nung BJP national general secretary, Saroj Pandey-i Congress telok nungi Lekhram Sahu madak takok angu. Rogonü Chhattisgarh assembly complex nung election agiba mapang state legislator 90 nungi parnok 87-i vote agütsü aser item rongnungi Pandey-i vote 51 angu aser Sahu-i vote 36 angu ta state Assembly secretary aser returning officer, Chandra Shekhar Gangrade-i ashi. Chhattisgarh state assembly nung BJP MLA 49, Congress legislator 39, BSP züngsem ka aser independent MLA ka lir. Pandey-i lar indang party nungi MLA 49 indang vote den BSP aser independent legislator indang vote ya angu südi. Sahu-i vote 36 dang angu, kechiaser Congress legislator – Amit Jogi, Shiyaram Kaushik aser Rajendra Rai – nunger ya party anema mapa inyakba ajanga election nung shilem magidaktsü.
TRS candidate B Prakash, B Lingaiah Yadav aser J Santosh Kumar nunger ya Telangana state nungi Rajya Sabha menden tazüng asem asoshi shimtetogo. Opposition Congress nungi nominee, P Balaram-i tamakok angu.
Prakash, Yadav aser Santosh Kumar nungeri vote 33, 32 aser 32 angu aser Balaram-i vote 10 dang angu.