Rajya Sabha election nung Ahmed Patel-i takok angu

New Delhi, August 09 (Agencies): Bodhbarnü BJP atema osang tamajung kaji, Congress candidate, Ahmed Patel-i Gujarat Rajya Sabha election nung BJP candidate madak takok anguba lir; tang agi pai kümsük pongububa atema Rajya Sabha MP inyaktsü.
Arishi küm 68 tain Patel ya Congress Tir, Sonia Gandhi indang political secretary lir, aser pai vote 44 ngua Congress toktsür BJP nung adensang, Balwantsinh Rajput madak takok angu.
Ano state nung tanüngba Rajya Sabha menden ana nungji BJP Tir, Amit Shah aser Union Minister, Smriti Irani nati takok angu.
Election osang sangdongba sülen Ahmed-i, “Tatem nungbo ochi agi takok angur. Iba takok ya kü kija indang masü. Iba ya sen amshiba, tashiyim amshiba aser tim mesüi sorkar tashi amshiba tamakok ngudaktsüba lir,” ta metetdaktsü.
“BJP-i Congress nung tashimait MLA karbo mesüzüktettsü akok, saka Congress party bo makoktsü,” ta paisa ashi.
Yashi election agiba sülen Congress-i Election Commission ajurua, par MLA anati BJP tongti, Amit Shah dang ballot sayuogo, anungji vote anaji magila kümjang ta takhangba agüja liasü.
Iba sülen yasüng ayaterm nung election ketdangsertemi vote anaji magila kümtsür tanep 1:45 ako nungi vote azüng.
Gujarat election officer-i, MLA 176 pronglai vote agütsü, aser iba nungjagi Congress MLA ana- Bholabhai Gohil aser Raghavjibhai Patel na indang vote bo magila liasü. Tenati cross-vote agütsü aser tena indang ballots ji BJP Tir, Amit Shah dang sayu, aser ibaji temzüng alema inyakba ta jangja, ta metetdaktsü.
Gujarat Assembly nung BJP MLA 122 lir.