Rajya Sabha-i Chhattisgarh nung sepai 17 tepsetba aitsü

New Delhi, March 23 (Agencies): Hombarnü Rajya Sabha-i Chhattisgarh kübok Sukma district nung Maoists telungpurtemi security sepai 17 tepsetba aitsüogo.
Rajya Sabha senden tenzükba sülen Chairman, M. Venkaiah Naidu-i, “March 21, 2020 aonung Chhattisgarh nung Sukma district kübok Bastar region nung aliba Minpa arem nung Maoists den raradang security sepai 17 asü aser 15 yiru,” ta metetdaktsü.
Paisa, “Iba ama tasümait mapa ya ajaki aitsütsü tetemsü, aser ibaji anema sashia inyaktsü nüngdak,” ta ashi.
Chairman-i, “Iba ama tatalokba ajanga asen sepai senti takümtem samaba agi jashir aser iba ya tia maka tatalokba,” ta ashiba sülen senden nung züngsem ajak nokdaker minute ka shi ola madoki asürtem nem akhüm agüja sarasadem.
Maoist telungpurtemi security sepaitem amakba sülen Amongnü Ato kilonser, Narendra Modi-ia taküm tenla agüja asürtem nem akhüm agüja liasü.
Modi-i twitter ajanga, “Iba tatalokba nung taküm tenla agüja asür sepaitem nem ni akhüm agütsür. Parnok tasütait mapaji kodanga mamatoktsü. Mangyimer kibongtem den ni mangyim jashi lemsateper. Yirua alirtem tekaraba nung aneptsü atema ni sarasademtsür,” ta lemsatep.
Union Home Minister, Amit Shah-ia twitter ajanga, “Parnoki taküm tenla agütsüba atema ni akhüm agütsür. Ni parnok kibongtem den mangyim jashi lemsateper. Iba ama mangiym mapang nung linük nübur ajak nenok den lir. India-i Maoists anema maneni raratsü,” ta metetdaktsü.