Rajya Sabha MP Kenye-i Naga nunger tebilemtsütem lemsatep

Kohima, April 25 (TYO): Nagaland nungi Rajya Sabha züngsem tasen shimba, K G Kenye-i osangbener senden ka nung Naga yimten tebilemtsü, road, power, health & education dena infrastructure renloktsü atema jembi.
Yaküm August 3 nü Centre aser NSCN(IM) tsüngda framework agreement agitetbaji küm 18 tashi yimjung olemtep liyonga aruba ajanga liasü. Tesüiba mapang nunga tenangzüktep agitepogo saka Naga nunger asoshi yimjung bener marutet, ta Kenye-i ashi.
Naga nüjiso bushiba teloktem balala lemsa aser parnok rongnung NSCN(IM)-i iba jenjang tongtetogo, anungji Naga yimten tebilemtsü ya tom ka nung meyui, joko nisung ajaki agizüktettsüsa tatembang telemtetba ka agitsüla, ta paisa metetdaktsü.
Kenye-isa infrastructure tsütsü jembidang, Nagaland nung communication aser gari lenmang atema tongti süa inyaktsü kechiyong railway aser air connectivity tajung mali, ta ashi.
Gari lenmang tesentaktep tajung yangluba ajanga petroleum, gas aser minerals amala ali rongsen agiteta shishilembatsü aser ibaji ajanga Nagaland nung alirtem rongsenkettsüng jenjang ajungkettsü, ta paisa shisem.
Tanü senden nung osangbenertemi Kenye dang pa Rajya Sabha MP shimba ajanga NPF Secretary General indang menden azüngtettsüsa asü koda ta asüngdangdang, “iba telemtetbaji Party lennirtemi dak dang keta lir” ta pai langzü.
“Kü indang kümsük jibo 2020 tashi inyaktsüba lir, saka kechi telemtetba agidir ibaji ni agizüktsü. Ni Party tenzüktsü mulunga dang lir” ta Kenye-isa ashi.