Rajya Sabha nung jembitsü Tendulkar nem mapang magütsü

New Delhi, December 21 (Agencies): Rajya Sabha nung Congress lenirtemi takhangba agüja longkak aitba ajanga cricket asayar nüngtugu aser MP, Sachin Tendulkar nem o jembitsü mapang magütsü.
Brihostibarnü Rajya Sabha nung Tendulkar-i India nung saisapong aser asayatsü temeten onük nung ‘Short Discussion Motion’ benoka liasü. Paisa International sabang nung medal angurtem nem Central Health Guarantee Scheme (CGHS) agütsütsü aser school curriculum nung saisapong inoksemtsü atema benoktsü tebilemba liasü.
Ajisüaka Tendulkar nokdaker jembi tenzükli Congress MP temi Ato kilonser Modi-i taoba Ato kilonser, Manmohan Singh-i Pakistan den senteper inyak ta jembiba atema tatok meshitsüla ta yimyim ayim tenzük.
Bharat Ratna angusang, Tendulkar ola madoki minute 10 shi nokdak, kechiyong opposition MP temi Chairman Venkaiah Naidu-i ashiba mangai yimyim ayima liasü.
Naidu-i, “Asenok saisapong onük nung o lemteper, nenok dak saisapong tanela mali asü?” ta jashia asüngdang, iba sülen pai senden thinena liasü.
Tesülen osangbenertem den jembidang BJP MP, Jaya Bachchan-i, “Pai (Sachin Tendulkar) alima sabang nung India nem tenüng tajung bener arutsü. Tanü jembitsü atema onük rongnung densema liasü, ta ajaki meteta liaka pa nem mapang magütsübaji taaktsüka lir. O jembitsü atema yimtenren lenirtem nem ang mapang agutsütsü asü,” ta ashi.