Rajya Sabha nung opposition-i sorkar aitsü

New Delhi, Nov. 16 (Agencies): Bodhbarnü asükwa Parliament senden mezüngnü Opposition party temi sorkari sen 500, 100 notes anentsüba telemtetba agiba atema sorkar anema sashia jembiogo.
Rajya Sabha nung Congress lenir, Anand Sharma-i sen melentsü mesüra sen agizüktsü atema tarensen nung nokdakertem mezüngmeshiba atema Ato kilonser, Narendra Modi-i tatok meshitsüla, ta ashi.
“Goa nung jembidang Ato kilonseri tarensen nung nokdakertem mezüngmeshiba o ni aitsür. Pai tatok meshitsüla. ATMs nung melentepa nisungtem nokdaker. Tarensen nung nokdakdang nisung aika süogo. Sorkar dak temeim mali. Ner sorkar dak taochi mali,” ta Congress lenirisa ashi.
Kasa onük nung sorkar aija CPM lenir, Sitaram Yechury-ia, “Sen 500, aser 1,000 notes anentsüba ajanga ochimashi anentsü ta nai bilemer asü? Sen note 2000 ajanga ochimashi taliba adoktsü,” ta ashi.
Yechury-isa sen 2000 note ka amer, “Nisung shingaia iba ya maginer, kechiyong iba atema sen tanük aika meyipa agütsütsüsa akümtsü,” ta ashi.
Tanü Delhi nung TMC tongti aser West Bengal Chief Minister, Mamata Banerjee-i longkak aita Rashtrapati Bhavan-i oa Tir, Pranab Mukherjee dang iba onük nung tiyongtsüi aita inyaktsü mepishiogo.
Mamata den National Conference, AAP aser Shiv Sena nungi lenirtemi Tir nem tezüluba ka nung iba temepishiba agütsü.