Rajya Sabha nung opposition-i VK Singh anentsütsü akhang

New Delhi, December 04 (Agencies): Hokolbar nü Rajya Sabha senden nung opposition party temi Union minister VK Singh minister menden nungi anentsütsüla ta takhangba agüja liasü.

Haryana nung Dalit tanur ana tepsetba dak sentakba nung jembidang Singh-i tanurtemji azü den medemdanga jembiba anema senden nung opposition-i rongrong adokdakja senden asemben tashi mapang tatsütsü thinena liasü.

Senden anaben thinenba sülen opposition lenir Ghulam Nabi Azad-i, VK Singh ji ministry nungi dang masü saka Parliament nungia agientsüla, ta ashi.

“Dalit nunger tanur tepsetbaji pai azü den medemdanga jembiogo. Pa Cabinet nung maneni minister meinyaktettsü aser Parliament züngsem-a mesütettsü,” ta Azad-i ashi.

Congress aser Bahujan Samaj Party (BSP) züngsemtemi senden nung tejakleni oa ‘VK Singh murdabad’ aser ‘Rara adokdaktsüba sorkar kati meinyaktettsü’,” ta yimyim ayima liasü.

Iba mapang nung Minister of State for Parliamentary Affairs, Mukhtar Abbas Naqvi-i, “Onük masüba ka nungi parnoki (opposition) onük ka kümdaktsütsü meranger. Yimtenren nung tajangzük atema parnoki iba onük benoker,” ta ashi.

Mendenbuba, Hamid Ansari-i senden junga agitettsü merang saka Congress aser BSP züngsemtemi tanen makai minister anema yimyim ayimba ajanga mendenbubai nikongdang 1:00 ako tashi senden thinen.

Taküm Haryana, Faridabad kübok aliba yimtsüng ka nung tanur ana tepsetba dak sentakba nung jembidang taoba mapang Army tongti aser tang Union minister teinyaktak Singh-i, “local tatalokbatemji kodanga Centre sorkar den mesentakteptsüla. Nisung kari azü dak lung agi aonba ajakji sorkar khuret masü,” ta jembia liasü.

Tanep iba senden nung BSP tongti lenir, Mayawati-i, “Centre nung BJP-i aniba NDA sorkar tashii aruba mapang nungi linük nung loktiliba aser tamangba lokti tsüngda tesünep raksaogo,” ta ashi.

“Tejashitsü kaji, item ama nisungtem nem temerenshi agütsütsü melena sorkari parnok ang pusemer. Yashi VK Singh dak sentakba nung sorkari inyakbaji tejashitsüka,” ta lai ashi.

Deputy Chairman, PJ Kurien-i, iba onük nung pa nem temetetdaktsüba agüja mali, ta shia la dang ibaji benoktsü asüngdang.

Iba mapang senden nung rongrong adokba ajanga mendenbubai minute 15 senden thinena liasü.

Tanü 11:30 nung senden asentenshir tenzükdang BSP züngsemtemi maneni VK Singh onük benok aser SP lenir Ramgopal Yadav-i Mohan Bhagwat-i Ram tekülem ki indang jembiba o nung ajemdaker pa nem temerenshi agütsütsü takhangba agütsü, iba sülen Congress züngsem kari SP takhangbaji pusema yimyim ayimba ajanga senden thinena liasü.