Rajya Sabha nung SC/ST bill agizükogo

New Delhi, December 21 (Agencies): Hombar nü Rajya Sabha nung SC/ST bill agizükogo, koba ajanga Dalit aser tribal nisungtem nem nisung mesüra shiruru tasümang bendaktsüba mesüra nisung scü intokdaktsürtem nem temerenshi tulu agütsütsü.
Scheduled Castes & Scheduled Tribes (Prevention of Atrocities) Amendment Bill, 2014 ajanga item ama aibelen ken otem akatsü atema special courts tentettsü aser timtem ajururtem nem teyari agütsütsü latettsür.
Party ajak senden nung bangjemtepba sülen iba onük nung o matsütepi iba bill agizükogo.
Dalit nunger anema meimchir dak mapetba inyakba anema Congress züngsemtemi taoba hopta lungkak aitba aser BSP lenir Mayawati-i iba bill nung o matsüteptsü benokba mapang iba ozüng benoka liasü.
Congress, Left aser party karibo iba bill nung o matsütepi agizüktsüji memulungi liasü, ajisüaka Hokolbar nü Party ajak senden amenba mapang iba dak sentakba nung ajaki telemtetba ka nung bangjema liasü.
Iba Act yanglushia Bill nung temzüng alema aibelen inoksembatemji- tsüngsem agi azük yanglua azüktsüba, nisung/shiruru tasümang bendaktsüba mesüra scü intokdaktsüba, lokti alitak SC/ST kin tetshia mezüngmeshiba, SC/ST anema tamajung bilemja inyakba mesüra akhümtsübua aliba asürtem mezüngshiba aser lokti ka mesüra rongsenkettsüng nokdangba densema lir.