Rajya Sabha nung Triple talaq bill benok; Opposition-i ashishi

New Delhi, January 03 (Agencies): Lok Sabha nung Triple talaq bill agizükba sülen Bodhbarnü Centre sorkari Rajya Sabha nunga triple talaq bill benok, ajisüaka Congress-i anir opposition party temi ibaji ashishia liasü.
Bharatiya Janata Party (BJP)-i, triple talaq bill nung tenokdangba agütsütsü atema Congress-i Dalit nunger onük nung raraba onük benoker ta aitsü.
Ano külen Congress-i, sorkari Dalit nunger anema inyaker, ta aitsü.
Tanü Rajya Sabha nung Union Law Minister, Ravi Shankar Prasad-i iba bill benokba mapang nung Congress Party nungi züngsem, Anand Sharma-i, iba bill ji Standing Committee ka nem tama reprangshidaktsütsüla, ta takhangba agutsü.
Paisa Standing Committee nungji züngsemtem asütsü atema tenüng kar benoka liasü.
Ibaji ashishia BJP lenir aser Union Finance Minister, Arun Jaitley-i, züngsem kati ajungbena tebilemba onük süoktsü makok, ta ashi.
Jaitley-i, “Ajungbena tebilemba onük benokba atema senden nung züngsemtem aoksar, iba bill ya yashi benokba ka masü. Tajemba agia ghonda 24 bo mapang agütsütsüla,” ta ashi.
Congress-i triple talaq bill onük nung parnok tangatetba melenshir, ta shia Arun Jaitley-i, Lok Sabha nung Congress Party-i iba bill pusema liasü, ajisüaka Rajya Sabha nungbo parnok tangatetba melenshir, ta ashi.
Iba onük nung senden nung rongrong adokba sülen Brihostibarnü 11:00 ako tashi senden thinena ayu.
Muslim Women (Protection of Rights on Marriage) Bill, 2017 ya December 17, 2017 nü Lok Sabha nung opposition party tem nungi züngsemtemi ashishiaka Centre sorkari agizüka liasü.