Rajya Sabha senden anogo asemnübuba-a thinenogo

New Delhi, July 23 (Agencies): Tanü agi anogo asemnübuba taoba mapang IPL Mendenbuba Lalit Modi ken o aser Vyapam ochimashi ken o nung benoka Parliament nung rongrong adokba ajanga senden anaprong thinenogo.

Parliament monsoon session senden nung House anaprong (Rajya Sabha aser Lok Sabha) nung item ken o süoka mapang tatsütsü senden thinenogo.

Lok Sabha nung Mallikarjun Kharge densema opposition züngsem aikati Question Hour thinentsür item onüktem jembitsü benok. Ajisüaka Speaker Sumitra Majahan-i parnoki mepishibaji magizük.

BJP chief Whip, Arjun Ram Meghwal-i Congress Tir Sonia Gandhi’er jala kinüngbu Robert Vadra anema aliba ken o tongtibangsüa jembitsü benoka liasü.

Vadra-i pa indang facebook page nung MP tem kanga mejungi aija lir, ta pa nem tai tonglokja lir.

Senden nung rongrong tali adokba ajanga Speaker-i asüng tashi senden thinentsüsa aküm.

Rajya Sabha nunga Lalit Modi ken o nung Congress-i External Affairs Minister Sushma Swaraj la menden nungi aludakjang ta takhangba agüja rongrong adokba ajanga anepdang senden nung senden anaben tashi thinena liasü.

Nikongdang senden tenzüka Mendenbuba Mohammed Hamid Ansari-i Question Hour aginüa liasü saka opposition temi tekong meranga noktakba ajanga magiteti liasü.

Senden nung rongrong maneni adokba ajanga tatong Tir Ansari-i nikongdang 2:00 ako tashi senden thinena liasü.