Rajya Sabha senden nung Congress-i Jaitley anema lungkak ait

New Delhi, December 22 (Agencies): Delhi cricket tentet, DDCA nung ochimashi onük nung ajemdaker tanü-a Congress-i maneni Union finance minister, Arun Jaitley menden nungi anentsütsüla ta takhangba agüja lungkak aitba ajanga Rajya Sabha senden anaben tashi thinena liasü.

Tanep Congress MP, Kumari Selja-i DDCA onük nung Jaitley anema onük benoktsü merang ajisüaka Deputy Chairman, PJ Kurien-i ibaji benoktsü memela.

2013 tashi Jaitley küm 13 tashi DDCA Tir inyaka liasü.

“Jaitley-i pasasa anentsüla,” ta Congress züngsemtemi ayimtenba ajanga Kurien-i tanü 11:30 ako tashi senden thinena liasü.

“Sorkar tashi nung aliba party nungi züngsem (BJP MP Kirti Azad) kati Finance minister anema tai tonglokja lir,” ta lai ashi.

Iba onük jembitsü atema la nem temelaba magütsüi Kurien-i, House nung külem züngsem ka anema tai tongloktsübaji inyakyim ajanga memelar, ta ashi.

“Iba onük benoktsü atema ni nü dang masüngdanger. Ni shinübaji, inyakyim ka lir. Party züngsem ka anema tai tongloktsüba lira nai tezüluba nung Mendenbuba nem agütsüsüla, züngsem nemjia tezüluba nung agütsütsüla. Ibaji medenibo nai ibaji mebenoktettsü,” ta pai ashi.

Pai la (Selja) dang Chairman aser Jaitley na nem nai tezüluba nung agütsür ma (?) ta asüngdang.

“Nai ibaji inyaker ma (?) Nai züngsem nemjia metetdaktsütsüla,” ta pai ashi.

Iba sülen Kurien-i Zero Hour benokba mapang Congress züngsemtemi sabang tejakleni oa yimyim ayim.

“Kechiba nenoki Zero Hour jangjonger (?) Zero Hour ya züngsemtemi tongtibang onüktem benoktsü atema lir. Iba ama inyakba ya kechi tetezü, ni iba ya mangateter,” ta Kurien-i shia ano maneni senden tanaben thinen.