Rajya Sabha züngsem 53 anenogo, BJP ajangzüktsü

New Delhi, May 13 (Agencies): Hokolbarnü Rajya Sabha züngsem 53 tashi pei kümsük abensar anenogo, iba ya ajanga Congress takoksa angur, kechiyong par züngsem 16 tashi densema lir.
Ajisüaka BJP nungi minister pongu – Venkaiah Naidu, Piyush Goyal, Nirmala Sitharaman, Mukhtar Abbas Naqvi aser YS Choudhry nungerbo anenaka ano tanaben shimshitsü. Rajya Sabha nung BJP züngsem tali akumtsü saka majority bosa masütsü.
BJP majority aliba state, Rajasthan nung ano timba akumtsü, ajisüaka state election tem nung maneni tamakok anguba ajanga Congress tashi maitba akumtsü. Tanga party rongnung Samajwadi Party tashi taliba itshitsü saka BSP bo tashi ajema akumtsüa akok.
Karnataka nungi Rajya Sabha züngsem, Vijay Mallya anenba ajanga menden tazüng adoka aliba nungi Naidu shimshitsüa akok, mesüra BJP-i Telugu Desam Party teyari meshira Naidu, par state Andhra Pradesh nungi shimtsüa akok.
UP nung SP tashi taliba itshitsü. BSP züngsem trok anenba nungi ana dang shimshitsü. Ana rongnungji Satish Chandra Mishra densema lir. Bihar nung JDU) MP pongu anener, party-i menden ana, RJD-i menden ana aser BJP-i menden ka angutsü. Rajasthan nungi BJP-i menden pezüprong angutsüa akok.