Rakhine nüburtemi lungjemtsü ajungshir: Suu Kyi

Thandwe, October 17 (Agencies): Myanmar kübok Rakhine state nung alir Buddhist aser Muslim nüburtemi par mangatettepbaren agiener külemi lungjemer alitsü tajungshiba olen ka Myanmar opposition lenila, Aung San Suu Kyi-i tanü Honibar nü metetdaktsüogo.
Rakhine state anülulentip tsütsü Thandwe jila nung ayongba election nüboyimtsü sentong nung o jembidang Suu Kyi-i tanü iba olenji metetdaktsü.
“Nüburtem rong nung tamangba yimsü aser kin kidong dak ajemdaker tebendang alibaren agientsüji kanga dang tongtipang. Myanmar senso ajungai ka küma lungjemtsüla kechiyong nübor rong nung tesembatep aser tetsübo aliba ajanga asen linük rajang kümdaktsür,” ta lai ashi.
Mitkartemi küm 50 shi Myanmar madak yimsü süa arur külen tan mezüngsüa nübur ajungai tetsüdakba kecha majurui ochishia election nung shilem agidaktsütsü nükjidong nung Myanmar-i par election sentong taruba November ita 8 nü agitsü ayonga lir.
Tan election nung Suu Kyi-i aniba National League for Democracy (NLD) yimtenren teloki mitkartemi nungitba yimtenren teloktem madak takok ngua Myanmar sorkar tasenba tentettsü maongka angutsüsa tang jenjang tajung ngua lir.
Ajisüaka, 2012 küm nungi tenzüka Rakhine nung alir Buddhist aser Muslim nüburtem rong nung mangatettep adoka raratepba ajanga par election sentong nem tetsüdakba agütsütsü akok ta election mongintemi metetdaktsüogo.