Rakhine state nung benokba emergency ozüng agiener: Sein

Yangon, March 29 (Agencies): Mepet mesü agi sünga aliba Rakhine state nung taoba mapang benokba emergency ozüng agienba osang ka Myanmar Tir, Thein Sein-i tanü, Mongolbar nü metetdaktsüogo.

Myanmar anülulentip tsütsülen, Rakhine state nung Buddhist aser nütsüng yongsük ajema alir Rohingya Muslim nisungtem na tsüngda 2012 küm nungi tenzüka mangatettep adoka tongpang raraba osang bushiteta lir.

Myanmar nung democracy yimsüsütsü yimya benshitsü asoshi nokdakla, Aung San Suu Kyi-i aniba National League for Democracy (NLD) yimtenren teloki tentetba sorkar tasenbai yimsüsütsü tenangzükba agitsü anogo 1 anünga alidang Tir Sein-i Rakhine state nungi emergency ozüng agienba osangji ajungbena metetdaktsür lir.

Rakhine state nung taoba küm 2 shi tongpang kanga sashia raraba osangbo bushiteta mali saka idakji alir Rohingya nisung million 1.1 shi Rakhine state nung sünepa meliteti tensa mejungi aliba osang jangjaogo.

“Rakhine state nung alir nisungtem nem taoba mapang amabo lendong bener marutsüba aser ki o jen raksatsüba osanga ajema akümba osang bushitetba sülen Rakhine state nungi emergency ozüng agientsü lemtet,” ta Sein-i osang jangjashisü.

Myanmar sorkari Rohingya nisungtem ya par nütsüng rong nung mezüngoki parnok Bengali nisungtem ta züngshir.

Yaküm November ita agiba election sentong nunga Rohingya nisungtem nem candidate ama mesüra vote agütsütsüren nung shilem agitsü temetem magütsüi süidaktsü.