Rakzükraktemtsü merangdang Tripura nung Bangladesh mitkar ka zükset

Agartala, March 09 (Agencies): Bangladesh nungi nisung 12 arua Tripura nung rakzükraktemtsü merangba mapang mitkar ka asü aser ka apu.
“Griha Rakshi Bahini mitkar 8, sorkar mapa inyaker 2 aser civilian 2 densema Bangladesh nunger nisung 12-i India aser Bangladesh arrtsü alema aita India nunger yimtsüng ka nung Bodhbar aonung auyatsü merang,” ta South Tripura district indang Superintendent of Police, Tapan Debbarma-i osangbener dang phone ajanga ashi.
“Iba mapang yimtsüng nung aliba nüburtemi parnok aridoktsü merang aser temelaba magii arrtsü alema arurtemji ajen. Saka Griha Rakshi Bahini mitkar, arishi küm 62 tain, Nausad Mia iba tesem nung asü aser ka yiru. Yirur alisang ya sorkar mozüki kati police temi anir ao,” ta paisa ashi.
Iba lendong ya India aser Bangladesh arrtsülen South Tripura nung Puran Rajbari Police Station kübok Siddhinagar yimtsüng nung atalok.
Iba yimtsüng nung ya Muslim nunger kibong 12 shi alir aser Bangladesh nungertem ya India litsü len yagi auto-rickshaw ana nung aru. Saka yimtsüng nung alirtemi parnok aridok.
Iba arrtsülen ya Border Security Force (BSF) aser police ketdangsertem timba atenshia tanükba agütsüdagi. Tripura aser Bangladesh tsüngda arrtsü ya kilometre 856 lir aser tesem kar nungbo ano atsü meyanglui lir.