Ralan nung BBBP campaign kübok medical camp ka agi

Wokha, Rongjui/September 19 (TYO): Wokha District kübok Ralan Block Force-i September 17 nü Beti Bacho Beti Padhai (BBBP) campaign den Poshan Maah kübok anogo ka retreat den medical camp aser tetsür chanutem atema adolescent club tentetba repsema agiogo, ta ketdangsertem osang ka ajanga metetdaktsü.
Wokha District Administration-i sangdong ka ajanga, retreat sentong nung painting, kenten, literacy aser quiz competition agiba den külemi tetsür chanutem atema sü atakba class ka agia liasü, ta metetdaktsü.
Iba sentong nung jembidang Dr T Kikon-i tanur bena alidang anepaluyim, malaria aser merlai abenba tashidaktem indang metetdaktsü aser BBBP Icon, Nchumbi-i iba campaign indang nükjidongtem metetdakja liasü.
Iba sentong ya Zachamo leniba nung agi; Alexander Manager IDBI-i ketadangsüa recreation sentongtem agi aser Old Ralan Baptist Church Pastor, Renbomo Ovung-i sarasadema liasü.
Iba sentong nung kaketshirtem, taintem aser kinü tanur 150 dak tema treatment agitsüba den külemi mozü aser sanitary pads lema agütsü.