Ram Nath Kovind-i Angh menden toktsüogo: Yimtenren telok kari pusemer, kari ashishiteper

Patna/New Delhi, June 20 (Agencies): NDA presidential candidate shimba sülen Ram Nath Kovind-i Mongulbarnü Bihar Angh indang mapa nungi anenogo.
Tir Pranab Mukherjee-i tanü Kovind mapa nungi anenba shidi agizük.
West Bengal Angh Keshari Nath Tripathi nem Bihar Angh repsema inyaka atatsü atema mapa lemzüktsüogo.
Hombarnü Kovind-i Prime Minister Narendra Modi aser BJP tir Amit Shah na den ajurutep aser NDA nung madenba teloktem- BJD, TRS aser YSRCP temia Dalit lennir Kovind yaritsü ta metetdaktsüogo.
Kovind-i June 23, 2017 nü Tir election nung tokteptsü atema pa tenüng agütsütsü akok.
Mongulbarnü, Bharatiya Janata Party (BJP) lennir Subramanian Swamy-i ashiba agi, Tir inyaktsü atema Ram Nath Kovind dang nungi nübo tajungba mali.
Kovind ka aika ajangshia aruba aser tashitemetet lennir ka lir. Pa Dalit nunger asüba agidang tir candidate shimba masü, ta Swamy-i ashi.
“Pa dang nungi nübo tajungba mali. Pai Linük Temzüng kanga junga meteta lir. Pa Dalit nunger asübayong shimba dang masü, pai aika ajangshia aruogo aser aika meteta lir” ta paisa metetdaktsü.
Yashi BJP parliamentary board senden ka amenba sülen BJP tir Amit Shah-i tir election atema NDA-i Kovind shimba osang metetdaktsü.
Iba osang sangoktsüba sülen Prime Minister Modi-i Congress tir Sonia Gandhi aser taoba prime minister Dr. Manmohan Singh na den jembi aser Congress-ia Kovind yaritsü atema ayongzüka liasü.
Modi-isa Bihar Chief Minister Nitish Kumar, Andhra Pradesh Chief Minister Chandrababu Naidu aser Tamil Nadu Chief Minister E Palaniswamy nungertem den jembi.
Kovind-i Tir mapa kanga junga inyaktsü aser pai sensakertem, tangar memenepertem aser teküpbok jenjang nung alirtem ajungkettsü atema maneni inyaktsü, ta Modi-i ashi.
Ajisüaka, BJP-i Kovind shimba atema yimtenren telok kari mepelaba metetdaktsüogo. Congress nung lennir kari ashiba agi, BJP-i parnok dang kecha meshishii telemtetba agi aser külen BJP den yariteper Shev Sena-i iba ya vote angutsü atema inyakba mapa ka lir ta ashir.
Centre-i parnok vote bank ajungtsü atema Dalit nunger ka Tir election atema shimba süra, Shiv Sena-i teyari magütsütsü ta metetdaktsü.
“Nisung kari vote angutsü nükjidong nung Dalit nunger ka shimtsü meranger süra, onoki meyariteptsü” ta Shiv Sena tanishir Uddhav Thackeray-i ashi.
Trinamool Congress (TMC) tir aser West Bengal Chief Minister Mamata Banerjee-ia Kovind shimba atema mepelar ama metetdaktsüogo.
Tir Pranab Mukherjee mesüra External Affairs Minister Sushma Swaraj mesüra BJP lennir tejen LK Advani nunger amala jenjang nung alir ka shimtsüla, ta Mamata-i ashi.
Bihar chief minister Nitish Kumar-i Bihar angh Tir inyaktsü shimba atema pelaba metetdaktsü. Ajisüaka, iba dak sendakba onük ya JD (U) sasep nung kanga junga jembitsü, ta paisa shisem.
Kovind ya Koli ta ser Dalit nunger telok ka nungi lir. Pai Uttar Pradesh aser Bihar nung mapa jenti inyakogo aser BJP atema shisalen sayur Rashtriya Swayamsevak Sangh (RSS)-ia pa pusema nungiter.
Kovind ya lawyer ka lir aser pai BJP Scheduled Caste Morcha tir (1998-2002) aser All-India Koli Samaj tir mapatem inyakogo. Tir Pranab Mukherjee indang kümsük tembanga July 24, 2017 nü pai Tir menden toktsütsü aser iba atema July 17 nü India Tir election agitsü.
Election Commission of India (ECI)-i iba dak sendakba nung osang sangdongogo aser June 28, 2017 tashi tenüng agütsüba maparen inyaktsü.