Ram Nath Kovind-i Tir mapa junga inyaktettsü: PM Modi

New Delhi, June 19 (Agencies): BJP-i aniba National Democratic Alliance (NDA) sorkari linük Tir candidate atema Bihar Angh, Ramnath Kovind shimba pusema Ato kilonser, Narendra Modi-i, Kovind ya temzüng-ozüng tsütsü tera akanga lir, iba den külemi pai linük Temzüng indang junga meteta lir, anungji pai Tir mapa kanga junga inyaktsü, ta metetdaktsü.
Hombarnü Ato kilonser, Modi-i Twitter ajanga, “Aluyimer ka jabaso, Ram Nath Kovind ya tongmelang kibong ka nungi lir. Pai nüburtem tenzükba mapa nung kanga nendaka inyaka arudar aser sensakertem atema inyaka aruogo. Temzüng-ozüng tsütsü pa tera yanga lir aser pa shisatsü den külemi pai linük temzüng meteta aliba ajanga linük ajangzüktsü. Ram Nath Kovind-i Tir mapa junga inyaktsü aser maneni pai sensaker, lenimaortem aser tepetzük tia nung alirtem atema inyaktsü ta ni amanger,” ta ashi.
Tanep osanbenertem senden ka nung BJP Tir, Amit Shah-i NDA sorkari linük Tir candidate atema Bihar Angh, Ramnath Kovind shimba osang sangdonga liasü.
Tanep New Delhi nung BJP Parliamentary Board senden amenba sülen Tir candidate shim.
Ato kilonser, Narendra Modi, Union Minister tem- Sushma Swaraj, Nitin Gadkari aser M. Venkaiah Naidu nunger densema party nung tongti lenirtemi Tir menden atema o lemtepa liasü.
Ano külen opposition party tema June 22 nü senden ka amentsü ayongzükogo. Opposition candidate shimtsü atema Congress Party Tir, Sonia Gandhi-i opposition party temi akumba sub-group ka tenteta lir, aser iba telok nung züngsemtemji Congress lenir ana- Ghulam Nabi Azad aser Mallikarjun Kharge na, JD(U) lenir Sharad Yadav, Rashtriya Janata Dal (RJD) lenir Lalu Prasad Yadav, CPI(M) lenir Sitaram Yechury, TMC lenir Derek O’Brien, Samajwadi Party nungi Ram Gopal Yadav, BSP nungi Satish Chandra Mishra, DMK lenir R. S. Bharathi aser NCP nungi Praful Patel nunger lir.
India Tir election July 17 nü agitsü, kechiyong tang teinyakdak Tir, Pranab Mukherjee July 25, 2017 nü Tir menden nungi anisüngzüktsü.