Ram tekülem ki keraa yanglutsü imlar: Shiv Sena

Mumbai, March 11 (Agencies): Uttar Pradesh assembly election nung BJP-i takok tulu anguba sülen tanü Shiv Sena-i, joko state nung Ram tekülem ki tekaraba nung yanglutsü imlar, ta ashi.
Mumbai nung osangbenertem den jembidang Sena MP, Sanjay Raut-i, “Ram sendoka liasü, saka ibaji tatembang kati aruogo. Joko Ayodhya nung tekaraba nung Ram tekülem ki yanglutsü, ta onoki imlar,” ta ashi.
Tan election agiba mapang Sena-i BJP aser Ato kilonser, Narendra Modi kanga aija aruogo.
Punjab nung Congress-i takok anguba dak sentakba nung Raut-i, nüburtemi temelenshi ka aginüa vote agutsü, ta ashi.
Uttar Pradesh nung SP-Congress Party teloktepi tamakok anguba dak sendakba nung Raut-i, tan election nung tamakok angurtemi tangbo Shiv Sena ji tongtibang, aser Sena-i Modi mopungsem Mumbai telungi maitdaktsüba parnoki angatettsü, ta ashi.