Ram tekülem ki yanglutsü mapang tongogo: Shiv Sena

Mumbai, March 24 (Agencies): Tanü Shiv Sena-i, joko tangbo Ato kilonser, Narendra Modi leniba nung BJP-i Ayodhya nung mangatettep onük- Ram tekülem ki yanglutsü atema inyaktettsü, kechiyong tangbo linük nung Muslim nungeria lenir (Modi) den obang ka asütsüsa loktiliba-yimtenren tensa ka lir, ta ashi.
Shiv Sena indang osangkaket, ‘Saamana’ yim o bilem nung, “Tesüiba küm 25 tsüngda linük yimtenren nung temelenshi adokogo. Tang (BJP lenir tain) L K Advani ‘Margdarshak mandal’ nung lir aser Modi-i linük yimsüsür. Anungji Ram tekülem ki yanglutettsü, aser iba atemaji Supreme Court tetuyuba masü saka Modi tetuyuba nüngdaker,” ta ashi.
“BJP-i Uttar Pradesh nung takok tulu nguogo, aser iba ya ajanga nüburtemi Ram tekülem ki aginüba sayur. Yimsü tenüng nung iba ya nübur taginüba, anungji iba onük nung Supreme Court-i tiyongtsüi maittsüla. Tanübo linük nübur ajaki Modi-i ashiba angar aser Muslim nungeria pai ashiba angatsüsa tensa ka kümogo,” ta parnokisa ashi.
Sena-i ashiba agi, iba onük nung Supreme Court-i telemtetba ka agutsütsü ta imlaa liasü.
“Court adener telemtetba agitsüsa süra Anna Hazare, Baba Ramdev mesüra L K Advani nunger ama katia telemtetba agitetla. Iba atemaji court-i aotsü menüngdak,” ta Shiv Sena-isa ashi.
March 21, 2017 nü Supreme Court-i, Ayodhya nung Ram Janmabhoomi- Babri Masjid mangatettep li ji court adener lemtettsü akok, tamangba yimsü dak sentakba ken o temji ken o jembiba ajanga latettsü akok, ta shia liasü.