Ram tenla ki yanglutsü

Ayodhya nung Ram asoba tesem nung Muslim nunger tenla ki yanglua alidak Hindu nunger tenla ki asütsü atema linük nung tematiba obendangdak nungi obendanger tongtibai anir, obendanger par pongopronglai mulunga obendang agütsübaji linük nung Hindu nunger ajak asoshi tepelatsü osang asütsü. Atangji, iba jagi Muslim nungertema makoksatsüsa, tang parnok tenla ki Babri Masjid yanglua aliba tesem tasazük acres 2.77 dang nungi anaben agia tuluba, ali acres 5 tasazük ka government-i yaktasa Muslim nunger tenla ki yanglutsü asoshi agütsütsü latettsüba jagi Muslim nunger mulung anisüngzüktsü ta bilemer. Atangji, Ayodhya nung Muslim nunger tenla ki yanglua aliba raksatsübaji kenyongi ozüng aser tamangba yimsü anema inyakba mapa ka lir. Iba mangatettep ken o yagi linük nung tamang yimsü tsütsü telok tuluba ana, Hindu aser Muslim na tsüngda taoba küm 70 tashi okadak ken o katepa aruogo. Atangji, tang Ayodhya nung Muslim tenla ki yanglua alidakji Ram aso ta Hindu nungertemi amanger aser item maparen bushisadangertemia ( researchers) kasa tesem nung Ram asoa ta bushitetba osang ka agüja lir. India lima nung ya akhidang nungi Hindu yimsü dak amangertem liasü, anungji Hindu yimsü dak alaka tanga tamangba yimsütem yabo bendanger yimsü ta parnoki jembir. Aji shitak lir. Ajisüaka, India ama tamangba yimsü ajak sadema amangtsüsa linük temzüngi temeten agüja alidakji tamangba yimsü ajak amangtsü aser sayutsü koka lir. Ibayongji, Hindu aser Muslim yimsü dang nungibo tajungbaa ta angateta amanger Khristantema India nung aika lir. Ayodhya nung Ram asodak Muslim nunger tenla ki asüba ya alima aso 16 buba nung Mughal yimli mapang Babar Chubai yangluba liasü. Iba ken o nung Hindu nunger metentsüsa kuli ka angubaji, iba ama maparen bushisadangertemi Babar chubai Ayodhya nung Muslim tenla ki yanglubaji ali tazüng nung yangluba masü saka tangar tekülemdak tesem nung yangluba liasü ta ngutetba kuli ka liasü. Tetezü, Babar chubai yangji Muslim nunger tenla ki meyangludang, iba tesemji Hindu nunger tekülemdak liasü. Ibayongji, Muslim tenla ki yangluba sülena yangji Hindu nungertema külema aruba otsü lir. Ayodhya nung Hindu nunger o Muslim nunger na tsüngda tekülemdak tesem raktepba otsü yabo küm 70 tain otsü lir. Tang iba ken o angadanger obendang agütsürtem, tongi obendanger Ranjan Gogoi-i anir parnok obendanger pongo prongla masodang, 1950 küm Hindu nunger tekülemer ka tenüng agi, Gopal Singh Visharad-i Ayodhya nung Babri Masjid yanglua alidakji par tsüngrem yur külemtsü temeten meshia okadak ken o benok. Iba mapang nung jagi tamangba yimsü tapu balala amanger telok ana tsüngda meputepi aruba sülen  Hindu nungertemi Muslim nunger tenla kiji 1992 küm December 6 nü raksatsü. Iba anogo nung jagi telok ana tsüngda mangatettep tali adok aser Ayodhya nung tsüngrem mekülemtettsüsa aküm. Iba ama ken o nung ajaki temulung süa obendang agütsütsübaji kanga tasak asüba agi küm talangka obendang magütsüteti aruba sülen tangang agütsütetter. Atangji, okadak nungi masü saka telok ana tsüngda tangatettep nung iba ken o ya latettsü aiben merangdangogo saka makokba agi okadak nungi dang obendang agütsüogo. Atangji, Muslim  nunger ajakibo iba obendang ya magizüktetter, ajisüaka shingaia telok anaprongla kasasa pelatsüsabo obendang magütsütettsü, anungji tang kechi obendang agütsüogo, iba nungji temulung sür linük nung nübortem rongnung yimjung aser tesünep lidaktsütsü tangatetba nung agizüktsü junger. Iba kasa tangatetba nung yimten telok shiai tamangba yimsü ka tsütsü atsünga masü saka tamangba yimsü ajak nem kasasa aküm agüja yimten nung telemtetba agira linük nung nübortem tesünep nung alitsü aser India telongjem aser tashi wangshiwangshia akümtsü.