Ramanujan film-i IFFI 2015 lapoktsütsü; Anil Kapoor tongti tesemdanger asütsü

New Delhi, November 03 (Agencies): India nunger mathematician, Srinivasa Ramanujan taküm otsü nung ajemdaker yangluba film, ‘The Man Who Knew Infinity’-i 46 buba International Film Festival of India (IFFI) lapoktsütsü sentong renemogo.

India kübok Goa nung tan November ita nungi tenzüka anogo 11 tashi agitsü ayongba film benjungmong sentong nung Bollywood actor, Anil Kapoor tongti tesemdanger asütsü.

Matthew Brown-i direct süa yangluba ‘The Man Who Knew Infinity’ film nung India nunger Britain senso aser Kapoor den arok nungtugu ‘Slumdog Millionaire’ film nung tongti shilem agisang, Dev Patel-i tongti shilem agia lir.

Ramanujan ama shilem agisang, Patel aser professor G H Hardy ama shilem agir, Britain actor, Jeremy Irons na Britain kübok Cambridge nung medemtetba aser ibaji ajanga mathematics tajungba küma melenshitsüba otsü dak ajemdaker iba ‘The Man Who Knew Infinity’ film ya yanglua lir.

“46 buba IFFI benjungmong sentong nung India aser bendanglen yangluba film balala sayutsü sentong renema lir. Taküm agitsü ayongba sentong nung World Cinema shilem nung linük 89 nungi film 187 tashi sayutsü aser Indian Panorama shilem nung India nung yangluba Feature film 26 aser Non-Feature film 21 tashi sayutsü renemogo,” ta India Information & Broadcasting Minister, Arun Jaitley-i metetdaktsüogo.