Ramdev, BJP-i Uttarakhand nung onok anema inyak: Cong

Dehradun, March 24 (Agencies): Uttarakhand nung yimtenren tensa anokshiba mapang ka nung state sorkar tashi nung aliba party, Congress-i, Yoga tesayur Baba Ramdev-i BJP den senteper state sorkar atsüngtoktsü meranger, ta sashia aitsüogo.

Ajisüaka tanü Ramdev-ibo ibaji tai ta shiogo.

Bodhbarnü Dehradun nung Uttarakhand Congress Tir, Kishore Upadhyay-i, “Yoga tesayur aser BJP tongti, Amit Shah nati state sorkar atsüngtoktsü atema sentong tamajung yanglur, aser ibaji- party MLA temi chief minister, Harish Rawat anema apusoba ajanga kuli sayur,” ta jembia liasü.

Item atemaji kuli peria lir ta shia Upadhyay-i, “BJP dak alia Ramdev-i Congress nung melung masürtem aser tongti nisung ka den tongtepratepa liasü aser parnok senteper tashi nung aliba party anema sentong tamajung yanglu,” ta ashi.

“State sorkar atsüngtoktsü atema pai (Ramdev) BJP agent ka ama inyak,” ta state Congress tongti lenir, Upadhyay-i ashi.

Upadhyay-i ashiba agi, Ramdev-i March 18 matongdang Congress nung melung masür MLA 9 den tongtepratepa liasü.

Item osang osangkakettem nung züngshiba sülen Ramdev-i, yimtenren tensa mejungi aliba mapang nüngdak makaba nung pa tenüng amshir, iba nungji pai shilem agia mali, ta metetdaktsü.

Tanü Haridwar nung osangbenertem den jembidang Ramdev-i, “Ni osangkakettem nung Ramdev aser Amit Shah na senteper state sorkar astüngtoktsü meranger ta züngshi. Ni pungmang nunga Congress MLA mesüra party nung inyaker shinga den-a mejembi. Onoki kechisa inyakdir, ibaji yimjak nung inyaker,” ta ashi.

“Iba onük nung onoki agitsü shilem mali. Item tatalokbatemji yimtenren party tem ajanga lir,” ta paisa ashi.

Iba dak sentakba nung Uttrakhand Congress tongti otongdar, Mathuradutt Joshi-i, Uttrakhand yimtenren tensa raksaba nung yoga tesayur Ramdev-i shilem agibaji pai kecha agia miimbanga meyutettsü, ta ashi.

Joshi-i, “Yoga tesayuri Uttarakhand nung sen crore 2000 indang shishilembar aser pa indang ‘trust’ anema ken o aika benoka lir. Pai state sorkar dang mangyangtsü aika lir,” ta ashi.

“Sorkar anema apusoba nung Ramdev aser BJP bangdak leniri shilem kanga odia agiogo,” ta Joshi-isa metetdaktsü.