Ramdev-i SC dang pa anema benokba ken otem Delhi-i belentsü mepishi

New Delhi, June 23 (Agencies): Bodhbarnü Yoga tesayur, Baba Ramdev-i Supreme Court dang pa anema benokba FIRs ajak Delhi-i belentsü mepishiogo.

Pai allopathy aser allopathy doctor tem anema jembiba atema pa anema ken o aika benoka lir.

Osang angazükba agi, Ramdev-isa Supreme Court dang Indian Medical Association (Patna aser Raipur units)-i pa anema ken otem benokba nung ajemdaker pa anema inyaktsü aliba nungi kümzükang, ta mepishiogo.

Taoba ita Ramdev-i, allopathy ya “shisa maka science” lir aser Drugs Controller General of India-i agizükba remdesivir aser faviflu densema mozü balalai coronavirus agi shirangertem treatment nung meyari, ta aitsüba sülen mangatettep tulu adoka liasü.

Ramdev-i, coronavirus atema amshiba mozü kar tashishitsü keta lir, aser coronavirus agi shirangertem nem allopathic mozü agütsüba agi nisung lakh aika süogo, ta jembia liasü.

Ramdev-i item o jembiba video ji social media nung prokshiba sülen Indian Medical Association-i pa jembiba o anema ola adok.

Linük tesem ajaklen doctor temi Ramdev dang tatok meshitsü takhangba agütsü aser Union health minister Harsh Vardhan-ia Ramdev-i jembiba oji aija liasü.

Taoba ita Ramdev-i allopathy aser allopathic doctor tem tenüng menükja jembiba atema IMA-i pa anema sen crore 1,000 indang defamation notice agütsü.

IMA-i, Ramdev-i IPC Arrla 499 kübok ozüng alema inyakogo, ta shia pa dang anogo 15 tsüngda tatok meshitsüla, aser pai tatok memeshira IMA züngsem shia sen lakh 50- sen crore 1,000 temenok meshitsü, ta metetdakja liasü.

IMA-isa Ramdev dang video clip ka ajanga pai jembibaji tai, ta pasasa nangzüka social media platforms nung prokshitsüla, ta takhangba agütsüba den külemi pa dang, pai social media nung coronavirus atema mozü ta shia “Coronil kit” advertise asüba ajak agientsüla, mesüra pa anema ken o benoktsü, ta metetdakja liasü.