Ranbir-i Sanjay Dutt jilu aiba ngur nüburtem süngmangtsü: Vicky Kaushal

Mumbai, March 30 (Agencies): Actor Vicky Kaushal shibai Rajkumar Hirani-i direct asüba Sanjay Dutt taküm otsü film nung shilem agir, pai ashiba agi, iba film nung Ranbir Kapoor-i Dutt jilushiba ngur aikati süngmangtsü.
“Nüburtemi iba film reprangdang Ranbir-i Sanjay jilushiba ngur süngmangtsü. Pai iba film atema kanga meranga inyak arudar aser pa shilem den kanga junga sendaktepa kümogo,” ta “Naam Shabana” screen asüba mapang Bodhbarnü Vicky-i ashi.
“Masaan” film nung shilem agisangi ashiba agi, iba amala project ka nung shilem agitsü asoshi maongka anguba atema kanga pelar, aser pungmang atalokba mesüka lir.
“Sanjay Dutt taküm otsü film nung shilem agitsü asoshi maongka anguba ya kü pungmang atangji nung atalokba ka lir. Ni Rajkumar Hirani, Abhijat Joshi, Ranbir Kapoor aser Vidhu Vinod Chopra nunger sapur ka lir, aser mapang mapang nungbo parnok den külemi mapa inyaka angazükdang pungmang ama bilemer,” ta pai ashi.
“Ni film nung shilem agi tenzüker yamai kerabo parnok amala nisungtem den shilem agitsü asoshi maongka angutsü ta bilema maliasü,” ta paisa ashi.
“Ni iba film nung Sanjay Dutt tembar ka ama shilem agir. Iba tembar ya Sanjay taküm nung timtem tekangshi aser tepela ajak nung pa den densema aliba tembar ka lir,” ta film nung pa shilem indang jembidang Vicky-i ashi.