Ranbir o Deepika nati ‘Tamasha’ producers nem sen crore 15 meyiptsütsü akok

New Delhi, January 06 (Agencies): Imtiaz Ali’er ‘Tamasha’ film nung tongti shilem agir, Ranbir Kapoor aser Deepika Padukone nati tena nem film nung shilem agiba atema agütsüba taa sen film producer-tem meyiptsütsü lemtetba osang ka angazükogo.
‘Tamasha’ film yangluba sülen kasa film-i imalaba ama sen maazüktetba yong Ranbir o Deepika nati sen crore 15 tashi film producer-tem nem meyiptsütsü lemtetba osang jangjaogo.
“‘Tamasa’ film ya nüburtemi kanga junger ta agizük saka iba film-i bilemba ama senbo maazükteti lir aser iba yongji Ranbir aser Deepika nati tena nem agütsüba taa sen film producer-tem, UTV aser Sajid Nadiadwala nem meyiptsütsü lemtet,” ta MissMalini.com-i osang jangjashitsü.
Ranbir-i sen crore 10 aser Deepika-i sen crore 5 meyiptsüsü renema lir ta osangi shisem.
Ano külen, ‘Bombay Velvet’ film-ia imlaba ama sen maazüktetba yong Anurag Kashyap-ia film yangludang indokba sen producer-tem nem meyiptsütsü lemtetba osang angazükogo.