Rani Ma Gaidinliu tasoba anogomung nung tetushi agütsü

Dimapur, January 28 (TYO) : January 26 nü Raj Bhavan, Kohima nung Rani Ma Gaidinliu tasoba anogomung tenüng nung sentong ka ayongzüka agi.
Iba sentong nung Commissioner & Secretary to Governor, Piyush Goyal-i Rani Ma Gaidinliu indang taküm otsü aser lai inyakba mapatem indang osang metetdaktsü, ta PRO Raj Bhavan sangdong ka nung metetdaktsü.
Rani Gaidinliu ji January 26, 1915 nü Manipur nung aso aser la ya Naga nunger tamangba aser yimtenren lennir ka liasü. Lai India nung British nunger yimsüsüba anema rara, ta Piyush Goyal-i ashi.
1932 küm la arishi küm 16 asüdang British nungeri apu aser la taküm piyong tepuokdak ayutsü atema temerenshi agütsü. Ajisüaka, India nüjiso anguba sülen 1947 küm la tepuokdak nungi chiok aser lai maneni nübortem ajungkettsü atema mapa inyak, ta paisa metetdaktsü.
“La nüjiso atema rarar ka asüba agi la aiwa asüdang küm 15 tashi tepuokdak liasü aser 1937 küm asen linük nung mezüngbuba Prime Minister asür Pandit Nehru-i Shillong tonga la tepuokdak nungi chioktsü atema mapa inyak. Pai la nem ‘Rani’ naroküm agütsü” ta Piyush Goyal-isa ashi.
Sentong nung Nagaland Angh, P.B Acharya aser Raj Bhavan staff temi la nem naro yuja tetushi agütsü.
Nagaland Angh-ia Rani Gaidinliu indang taküm aser lai inyakba mapa kar metetdaktsüdang, 1965 küm asür P. Shilu Ao’er sorkar mapang pai la den mezüng ajurutepba indang ashi.
Iba mapang Rani Gaidinliu ji Minister’s Hill, Kohima nung ‘House arrest’ nung yua liasü, ta Angh Acharya-isa shisem.