Rani Mukerji & kinüngbu na nem jala ka moatsüogo

December 09, 2015: Chopra kibong atema December, 09, 2015 nü ya temoatsütiba anogo ka asütsü, kechiyong Bollywood actress Rani Mukerji aser la kinüngbu Aditya Chopra na nem jala ka moatsüogo.

Film yanglur Karan Johar-i twitter ajanga iba osangtajung sangdonga, “Tanü ni tobur tajung jala ka indang Oko kümogo!!!!! @udaychopra !!! Rani aser Adi na jala ka nguogo,” ta ashi.

Rani ya Mumbai nung aliba mozüki ka nung munga liasü aser lai, “Adira ya onok atema Tsüngrem nungi sempet tulutiba,” ta ashi.

Adira ya tanep Breach Candy Hospital nung aso. Iba dak sentakba nung arishi küm 37 actress-i la sapurtem, medemertem aser la nungitertem dang pelaba lemsatepogo.

“Onok atema sarasademtsür aser sapurtem ajak dang pelar. Tanü Tsüngremi onok nem sempet tulutiba, Adira agütsüogo. Onoki onok sapurtem, medemertem aser onok nungiter ajak dang pelar. Tepela nung onok akümli tasen tenzüker,” ta Rani-i sangdong ka ajanga ashi.

Karan Johar dak alia Bollywood nungi actor Ayushmann Khurrana aser Parineeti Chopra nungeri tama apuani na nem tenüngsang agüja liasü.

Rani aser Aditya na yaküm April ita Italy linük nung miima kibong akum. Rani kinungbu Aditya yabo tamalen Payal Khanna den kibong küma liasü ajisüaka 2009 küm tena bala.