Ranjit-i Solicitor General nungi anener

New Delhi, October 20 (Agencies): Central sorkar atema legal ketdangser tanabuba jenjang nung alisang, Solicitor General, Ranjit Kumar-i Hokolbarü pa menden nungi pasasa anenogo.
Taküm June ita nung Mukul Rohatgi-i Attorney General menden nungi pasasa anenba sülen tang Ranjit Kumar-ia Solicitor General menden nungi anener.
Ranjit-i pa den külemi inyakertem dang, “Nija kuli aser kibong dak sendakba onük kar nung ajemdaker ni mazüngtsü aser iba mapa meinyaktettsü, iba kuli nung ajemdaker ni kü sasa anener,” ta metetdaktsü, ta osang angazüker.
Sorkar den mepetmesü kar ali asü? ta asüngdangba langzüdang pai, “Sorkari tajungtiba nung ni anepalu. Sorkari kü den jungtepogo,” ta ashi.
Ranjit Kumar ya linük Temzüng dak sendakba ozüngtem nung mongin lir aser tamalen pa Gujarat sorkar nung counsel inyakba den külemi Supreme Court nung ken o aika atema-a inyaka aruba sülen 2014 küm June ita nung Solicitor General shima liasü.
Taküm June ita nung pa kümsük abensaba sülen pai ad-hoc extension ngua liasü, saka ita asem sülen pai sasa iba menden nungi anener.
Taküm June ita nung sorkar atema legal advisor tongti, Rohatgi-ia nija kuli kar nung ajemdaker Attorney General menden nungi pasasa anen.
Rohatgi anenba sülen K.K. Venugopal Attorney General shima liasü.