Ranveer nem Dinanath Mangeshkar Award agütsütsü: Lata

Mumbai, February 26 (Agencies): ‘Bajirao Mastani’ film nung tongti shilem agisang, Bollywood actor, Ranver Singh nem Dinanath Mangeshkar Award taküm 2016 küm April ita agütsütsü renemba osang ka nungtugu kentener, Lata Mangeshkar-i metetdaktüogo.

Lata-i aniba Mangeshkhar kibongi tebu, asür Pandit Dinanath Mangeshkhar nüngtem nung kümshi pa asünü tetemsü nisungtem iba Dinanath Mangeshkar Award ya agütsür.

India kübok Pune yimti nung sentong tajung ka agia, Ranveer nem Dinanath Mangeshkar sempetji taküm April ita 24 agütsütsü renema lir.

“Ranveer ya actor tajung dang masü saka nisunga tajung ka lir. Pai pa aoba tesem ajunga nung tepela bener arutsür. Taküm küm asoshi Ranveer nem kübo nüngtem nung agütsüba Dinanath Mangeshkar sempet agütsütsü renemba osang pelaseta sangdonger,” ta Lata-i shisem.

Ranveer-i 2010 ‘Band Baaja Baaraat’ film nung shilem agia Bollywood nung mezüngsüa tetsüng ajemokba sülen pai ‘Goliyon Ki Raasleela Ram-Leela’ aser ‘Lootera’ na densema, film aika nung shilem agia lir.