Ranvir Shorey-i Kadwi Hawa aser Padmavati film indang jembi

November 27, 2017 (Agencies): Nüngtugu actor tem rongnung ka Ranveer Shorey, shibai experimental film; Khosla Ka Ghosla, Bheja Fry aser A Death in The Gunj film nunger nung shilem agia takok nguogo pa maneni Kadwi Hawa film nung adokba angutsü. Iba film yaa experimental film ka lir aser film nung tzümopung tsütsü tebilemtsü aliba indang sayuba den külemi yimdaklirtem taküm indang aser parnok kati ka den tesendaktep indang jembir.
Tawa India yimtiba nung tzü mopung tsütsü tebilemtsü tulu adokba ajangshiogo, kong yimti nung mopung jenjang dangerous levels ajanga atu aser iba ajanga northern India ajunga nung tsübudaktsü. Iba dak sendakba nung Shorey dang environmentally conscious film sayaba aser tzümopung nung timtem adokba mapang kasa denjiba indang asüngdang dang pai ashiba agi, “Iba ya sentong yanglur aliba ka masü. Iba ya odang atalok. Delhi nung smog tebilemtsü adokba sülen nüburtemi climate indang tali jembi tenzük. Iba o ya mapang tatsüka kanga tongtibangsüa jembia arudar saka onoki iba film tangokba mapang nungbo iba onük ya jembia meliasü.”
Maneni ano Padmavati indang film dak sendakba nung mepetmesü adoka linük ajunga nung kanga tongtibangsa jembitepba indang jembidang ,pai Sanjay Leela Bhansali pusemogo, aser iba film dak sendakba nung pei tebilemba nung ameter film mesayadaktsütsü asoshi nokdakertem pai kanga mejungi aitsüogo. ” India nungeri item loktitem azüoktsüla aser parnok mulungba nung teti dangbo manidaktsüla.”
“Tangbo nisung ajak sena kaka lir aser item sena tem ajak mangatetep adokra India kechi tia kati aitsü? Ni bilembabo item sena tem ya arrtsü nung toktsütsüla kong parnok tasü aitba nüngdaka lir. Parnoki parnok tashi sayua film yanglurtem amokmerena theater tem rongtoktsüba ya kechi komala tashi sayuba yimya? Iba ya tasütait maparen ka masü saka gundagardi inyakyim lir,” ta paisa ashi.
“Tanungba lokti temi item nisungtem ya mindoktsüla kechiyong parnok yimya ajanga lokti menentsür,” ta actor-isa ashi.