Rara adokba sülen University of Nairobi shibang

Nairobi, October 04 (Agencies): Ketdangser, kaketshir aser police tsüngta azü tokshia raratepba sülen University of Nairobi shibangogo.
Iba university ya Kenya nung temaba jenjang nung lir aser iba university nung azünger nisung 84,000 tenüng züluoka lir, saka Mongulbar anepdang 9:00 ako tashi nung kaketshir ajunga university toktsütsü metetdaktsü.
Kaketshirtem university toktsür aotsü ghonda 12 dang tajemba mapang züngzüktsü, saka kaketshir aikati parnok indang fee meyiba magütsü tashi maotsü, ta nokdak.
Iba university shibangba indang osang ya kaketshirtemi social media nüng sangdong.
Linük yimden nung opposition telok nungi züngsem ka tepuokdak yua aliba chioktsü asoshi kaketshirtemi akhangba ajanga iba university indang vice-chancellor-i ‘anti-riot police’ ajaba sülen iba kaket reju shibang.
Police aser kaketshirtem tsüngta rara adok aser nisung aika yiru, ta osang ka ajanga ashi.
Hombar anogo anu kaketshirtemi longkak ait aser iba ya university indang vice-chancellor, Peter Mbithi menden nungi alutsüla, ta akhangba liasü.
Iba rogrong adokba sülen ghonda eshika lir Mbithi indang Twitter account nung university shibangba indang osang sangdong.
“O jembitsü temeden agütsüba aser yimjung den tesüngjem nung longkak aitba ya lisopur temeden aser tashi kicha agia agientsü makokba temeden ka lir,” ta Kenya Universities Student Organisation (KUSO) nung lenirtemi Facebook nung zülutsü.
University of Nairobi nung azünger kaketshir 84,000 dak tali lir aser mapa inyaker 2,000 dak tali lir.