Rara adokra India kanga takoksa angutsü: Raheel Sharif

New Delhi/Islamabad, September 07 (Agencies): Pakistan army tongti, General Raheel Sharif-i India amokmerena, par linük den rara jazükra India-i metizüktsüsa takoksa angutsü, ta ashi.

“Temalen (tanga linük) nungi amakba ajak koktettsüsa ozü mitkar dak tashi lir, ta ni o meyiptsür,” ta pai ashi.

1965 küm India den raraba sülen küm 50 ajungba nüngtem nung Deobar aonung Rawalpindi nung aliba army headquarters nung sentong ka nung jembidang Pakistan mitkar tongti-i, “Tsükchir (India) jagi rara tulu mesüra tila, aser rara tatsü mesüra talang mepetmesü adokdaktsüra, parnoki metizüktsüsa takoksa angutsü,” ta ashi.

Taoba hopta Indian Army tongti General Dalbir Singh Suhag-i India-i ajungbena rara tatsü adokba atema Indian Army renema dang lir ta jembiba dak sentakba nung Pakiatan leniri iba olen ya jembiogo.

“Telung nung aser temalen nungi amokmerenba tapu balala atema Pakistan Armed forces renema dang lir. Tatsük mesüra temekong-a süang. Onok renema dang lir,” ta General Raheel-i ashi.

India Partition onük nung Kashmir onük ya tatembang kati marui aliba onük ka lir, aser iba ya UN temzüng ajanga lemtettsüla, ta pai ashi.