Rara ajanga takoksa jenti ajurutsü: Khawaja Asif

New Delhi/Islamabad, Sept 03 (Agencies): Tawa Line of Control (LoC) nung India aser Pakistan sepaitem tsüngda injang yoktepa ajanga tensa mesüngjemteti aliba mapang ka nung tanü India amokmerena Pakistan Defence Minister Khawaja Asif-i, rara tatsü mesüra talang atema par linük renema lir, ta ashi.

Asif-isa, rara adokra Pakistan-i India kanga takoksa ajurudaktsütsü, ta merenogo.

Tawa India Army Chief Gen Dalbir Singh-i tarutsü nung mapang tatsüka tsüngda rara tatsü asoshi India renema lir ta jembiba dak sentakba nung Pakistan Army tongti-i tanü iba osang sangdongogo.

Radio Pakistan programme ka nung shilem agidang Asif-i, Pakistan-i yimjung aginer, ajisüaka parnok amakba meyiptsütsü meteta lir, ta ashi.

“Onoki yimjung aginer saka par (India) lenirtemi rara jazükra India kanga takoksa ngudaktsütsü,” ta pai ashi.

India Army tongti Dalbir Singh-i jembiba o dak sentakba nung Asif-i, “India-i rara tatsü mesüra talang ayongzükra junga meyiptsütsü atema Pakistan renema dang lir,” ta ashi.

Taoba mapang India aser Pakistan na rara adokba dak sentakba nung pai, 1965 küm rara nung Pakistan sepaitemi India sepaitem sentong tamakok ngudaktsü, ta ashi.

“1965 küm rara nung India-i Lahore atsünga aginüa liasü saka asen sepaitemi ibaji matalokdaktsü, aser tarutsü nunga kasaji inyaktsü,” ta Pakistan Minister-i ashi.

Defence Minister-isa, tesüiba küm 50 dang nungi Pakistan Army jenjang tang tajungba, ta ashi.

“Küm aika asen sepaitemi kiralongraba anema rara arur aser parnoki tayongzükba ajak koktettsüsa aika ajangshia lir,” ta pai ashi.

Ajisüaka Asif-i, Ato kilonser Nawaz Sharif-i yimjung aginer, ta ashi.